Нийгмийн бодлого, боловсрол, соёл, шинжлэх ухааны байнгын хорооны өнөөдрийн /2015.04.28. Мягмар гараг/ хуралдаанаар Хөдөлмөрийн аюулгүй байдал, эрүүл ахуйн тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийлээ. Хэлэлцүүлгийн шатанд Улсын Их Хурлын гишүүн Л.Энх-Амгалан, А.Бакей, С.Дэмбэрэл, Н.Номтойбаяр нар асуулт асууж хариулт авав. Тухайлахад, Улсын Их Хурлын гишүүн А.Бакей асуултдаа, барилгын салбар дээр хөдөлмөрийн аюулгүй байдал алдагдсанаар хүний амь нас хохирох асуудал гарсаар байгаа. Хөдөлмөрийн аюулгүй байдал алдагдахаас урьдчилан сэргийлэх арга хэмжээ авахад хөрөнгө зарцуулдаг байх. Харин нэгэнт осол гарсны дараах хохирлыг тухайн байгууллагаас хэрхэн барагдуулдаг талаар тодруулав. Хөдөлмөрийн сайд С.Чинзориг хариултдаа, үйлдвэрлэлийн осол, мэргэжлээс шалтгаалах өвчний улмаас амь насаа алдсан, хөдөлмөрийн чадвараа алдсан иргэдэд хоёр чиглэлээр нөхөн төлбөр олгоно. Нэгдүгээрт, Үйлдвэрлэлийн ослоос амь насаа алдсан бол 36 сарын цалинтай тэнцэх хэмжээний нөхөн төлбөрийг нэг ба түүнээс доошгүй удаа олгоно гэсэн одоогийн хуулийн зохицуулалт бий. Хоёрдугаарт, Нэмэлт даатгалын хэлбэрээр хуулийн төсөлд оруулж ирсэн. Эрсдлийн түвшин ихтэй ажлын байранд ажиллаж байгаа ажилтны амь нас, эрүүл мэндийн даатгалыг ажил олгогч нь заавал даатгуулахгүйгээр эрсдлийн түвшин ихтэй ажлын байранд ажиллаж байгаад амь насаа алдвал хамгийн бага нь 36 сарын цалинтай тэнцэхүйц хэмжээний даатгалыг арилжааны даатгалаас авдаг байхаар хуулийн төсөлд оруулж ирсэн. Энэ нь ажилтны ар гэрийн нийгмийн тогтолцоог сайжруулахтай холбоотойгоор оруулж ирж байгаа цоо шинэ төрөл юм. Ажлын байран дээр осолд өртсөн иргэд тодорхой хэмжээгээр ажил олгогчид ханддаг. Барилгын салбарын гаднах талбайд осол гарвал ажил олгогч хариуцлага хүлээхгүй байгаа. Тиймээс үйлдвэрлэлийн орчин, гаднах талбайд осол гарвал ажил олгогч хариуцдаг байхаар хуулийн төсөлд тусгаж өгсөн гэсэн хариултыг өглөө. Мөн хэлэлцүүлгийн шатанд Улсын Их Хурлын гишүүн Л.Энх-Амгалан, С.Дэмбэрэл нар зарчмын зөрүүтэй санал гаргасныг хуралдаанд оролцсон гишүүдийн олонх дэмжив. Мөн байнгын хорооны хуралдаанаар Нийгмийн даатгалын үндэсний зөвлөлийн 2014 оны үйл ажиллагааны тайланг хэлэлцлээ.

Нийгмийн даатгалын үндэсний зөвлөлийн 2014 оны үйл ажиллагааны тайланг Улсын Их Хурлын гишүүн, Хүн амын хөгжил, нийгмийн хамгааллын сайд С.Эрдэнэ танилцуулав. Танилцуулгад дурдсанаар, Нийгмийн даатгалын үндэсний зөвлөлийн гишүүд нь Улсын Их Хурлаас 6 жилийн хугацаатай томилогдон ажиллаж байгаа бөгөөд өнөөдрийн байдлаар Нийгмийн даатгалын үндэсний зөвлөл нь Засгийг газрыг төлөөлсөн 3 хүн, ажил олгогчийг төлөөлсөн 3 хүн, даатгулагчийг төлөөлсөн 3 хүн буюу нийт орон тооны бус 9 гишүүнтэйгээр үйл ажиллагаа явуулж байна. Нийгмийн даатгалынүндэсний зөвлөл 2014 онд 6 удаа хуралдаж, 39 асуудал хэлэлцэн 35 тогтоол батлан гаргаж, биелэлтэнд нь хяналт тавин ажилласан. Нийгмийн даатгалын санд 1141,6 тэрбум төгрөгийн орлого бүрдүүлж шимтгэлийн орлогын төлөвлөгөөг 91,3 хувиар биелүүлсэн байна. Танилцуулгатай холбогдуулан Улсын Их Хурлын гишүүн Л.Энх-Амгалан, Я.Содбаатар, А.Тлейхан, Д.Хаянхярваа, С.Дэмбэрэл нар асуулт асууж хариулт авлаа. Гишүүдийн зүгээс Нийгмийн даатгалын сангийн мөнгийг одоогийн хуулиас гадуур илүү ашигтайгаар арвижуулах боломж байгаа эсэх, нэрийн дансны 8,8 их наяд төгрөгийн төлбөрийг барагдуулах асуудлаар ямар бодлого барьж байгаа, Хамтын тэтгэврийн хуулийг баталснаар Нийгмийн даатгалын санд ямар хэмжээний ачаалал ирэх, Нийгмийн даатгалын сангийн чөлөөт үлдэгдлийг ямар шалгуураар арилжааны банкуудад байршуулдаг болон НДҮЗ-ийн гишүүдийн бүрэлдэхүүнийг ямар сонгон шалгаруулалтаар томилдог талаар асууж тодрууллаа. Улсын Их Хурлын гишүүн, Хүн амын хөгжил, нийгмийн хамгааллын сайд С.Эрдэнэ хариултдаа, сангийн чөлөөт үлдэгдлийгөөр ашигтай хэлбэрээр өсгөх чиглэлээр Монголбанк, Сангийн яамтай хамтарч ажлын хэсэг байгуулан ажиллаж байна. Цаашдаа төрийн даатгалын санг урт хугацааны, найдвартай, тогтвортой хөрөнгө оруулалтын сан болгох чиглэлээр судалгаа тооцоо хийж байна. Мөн үүнтэй уялдуулаад нэрийн дансны 8,8 их наядыг барагдуулах, мөнгөжүүлэх, хөрөнгөжүүлэх асуудал хийгдэнэ. Өнөөдөр Монгол Улсын Ерөнхий сайдын захирамжаар ажлын хэсэг гарч энэ чиглэлээр Монголбанк, Сангийн яам, Хүн амын хөгжил, нийгмийн хамгааллын болон холбогдох яамдуудтай хамтарсан ажлын хэсэг гарган ажиллаж байна. 2.1 их наяд төгрөгийн хөрөнгөөр баталгаажсанүнэт цаасыг тэтгэврийн санд шилжүүлэх хувилбарыг судалж байна. Цаашид үүнийг шийдэж чадвал Нийгмийн даатгалын санд найдвартай, байнгын орлогын эх үүсвэр бий болох юм. Энэ асуудлыг шийдэж чадах юм бол жилдээ тэтгэврийн даатгалын сан буюу нэрийн дансанд хөрөнгө, мөнгө төвлөрөх боломжтой гэлээ.

 

Байнгын хорооны хуралдаанаар Нийгмийн даатгалын үндэсний зөвлөлийн 2014 оны үйл ажиллагааны тайланг өмнөх жилээс сайжирч, дэвшил гарсан байна гэсэн дүгнэлтийг хийж, цаашид Нийгмийн даатгалын үндэсний зөвлөлийн гишүүдийн бүрэлдэхүүнд өөрчлөлт оруулахад анхаарах, Тэтгэврийн зээлийн хүүг бууруулах чиглэлээр Нийгмийн даатгалын үндэсний зөвлөл арилжааны банкны удирдлагуудтай уулзаж, санал боловсруулан гарсан үр дүнг хоёр долоо хоногийн хугацаанд эргэж танилцуулахыг Байнгын хорооны тэмдэглэлээр үүрэг чиглэл болгох нь зүйтэй гэж үзлээ хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.