УИХ-ын гишүүн  С.Дэмбэрэл, Д.Ганбат, Ц.Оюунбаатар, Ц.Оюунгэрэл нар болон Хүний эрхийн үндэсний комиссын зарим гишүүд Шүүхийн шийдвэр гүйцэтгэх ерөнхий газрын харъяа цагдан хорих 461 дүгээр ангийн үйл ажиллагаатай танилцав.   461 дүгээр хорих ангид өнөөдрийн байдлаар 788 хүн хоригдож байна. Үүний 60 гаруй хувийг хулгайн гэмт хэрэг эзэлж байгаа ажээ.  Гишүүд хорих ангийн нөхцөл байдалтай танилцахын зэрэгцээ хоригдож байгаа сэжигтнүүдээс ямар хугацаанд, ямар хэргээр хоригдож байгаа болон хүний эрх хэрхэн хангагдаж байгааг тодруулж байв.  

 

Энэ үеэр УИХ-ын гишүүд Монгол Улсын хууль эрх зүйн орчин хорих, мөрдөх, тагнах чиглэл рүү илүү хөгжөөд, өмгөөлүүлэх эрхээ хамгаалуулах үйл ажиллагаа хоцрогдож байна гэсэн гомдол ихээр ирж байгааг хэлээд УИХ-аар хэлэлцэж буй Гэр бүлийн хүчирхийлэлтэй тэмцэх тухай хуулийн төсөлтэй холбогдуулан гэр бүлийн хүчирхийллээс болж хоригдож байгаа хүмүүсийн санал бодлыг сонслоо гэлээ.  Мөн Байнгын хороон дээр УИХ-ын гишүүн С.Дэмбэрэлийн санаачилан боловсруулсан Хүний эрхийн үндэсний комиссын хуулийн төслийг УИХ-ын чуулганаар хэлэлцсэн билээ. /2015.04.16/

Хуулийн хувьд 2000 онд Монгол Улсын Хүний эрхийн Үндэсний Комиссын тухай хуулийг баталснаар олон улсын гэрээ, конвенц, Монгол Улсын  хууль, тогтоомжийн биелэлтэд хүний эрхийн чиглэлээр хяналт тавьж, судлан дүгнэх үүрэгтэй үндэсний байгууллага болох Хүний эрхийн Үндэсний Комиссыг 2001 онд байгуулав. Сүүлийн 14 жилийн турш нэмэлт, өөрчлөлт, ямар нэгэн засваргүйгээр хэрэгжүүлж ирсэн энэхүү хуулийг "НҮБ-ын Парисын зарчмуудаар баталгаажуулсан наад захын зарим хэм хэмжээг хуульчлаагүй” хэмээн олон улсын зүгээс одоог хүртэл шүүмжлэлтэй хандаж ирсэн.

Уг хуульд нэмэлт, өөрчлөлт оруулснаар Монгол Улсын Үндсэн хууль, олон улсын гэрээнд заасан хүний эрх, эрх чөлөөний тухай заалтын хэрэгжилт болон хүний эрх, эрх чөлөөг хамгаалах, түүний биелэлтэд хяналт тавьдаг хүний эрхийн асуудал эрхэлсэн үндэсний байгууллагын эрх зүйн үндсийг сайжруулж, хариуцлагын тогтолцоог өндөрсгөж, хүний эрх, эрх чөлөөг хамгаалан ажиллах байгууллагуудын хоорондын уялдаа холбоог хангаж өгөхийн зэрэгцээгээр хүний эрхийн үндэсний байгууллагын эрх зүйн орчны боловсронгуй болгон олон улсын стандарттай нийцүүлж байгаагаараа ач холбогдолтой юм. Хуулийн төсөл батлагдсанаар төсөвт нэмэлт зардал гарахгүй болно.

 

 

 

УИХ-ын гишүүн С.Дэмбэрэлийн ажлын алба