Монгол Улсын Их Хурлын Эдийн засгийн байнгын хорооны өнөөдрийн /2015.04.17/ хуралдаанаар Монгол Улсын эдийн засаг, нийгмийг 2014 онд хөгжүүлэх үндсэн чиглэлийн биелэлтийг хэлэлцлээ.
Засгийн газраас 2014 оны үндсэн чиглэлд тусгасан эдийн засаг, нийгмийнхөгжлийн нийт 25 зорилт, 104 арга хэмжээ 63.7 хувьтай биелсэн гэж танилцуулгадаа дурдсан бол Үндэсний аудитын газар 104 арга хэмжээнээс бүрэн хэрэгжсэн 32, дутуу хэрэгжсэн 62, хэрэгжээгүй 10 буюу биелэлт 63.2 хувь байгаа тухай дурдаад, үндсэн чиглэлийн зорилт, арга хэмжээг зайлшгүй хэрэгцээ, шаардлагад тулгуурлан үндэслэлтэй боловсруулах нэгдсэн арга зүй, стандартыг тогтоогоогүйгээс төлөвлөлт оновчтой болоогүй, үндсэн чиглэлийг анхан шатанд боловсруулахад мэргэжил, арга зүйн дэмжлэг, нэгдсэн удирдамжаар хангадаггүй, төлөвлөлтөд үнэлгээ, дүгнэлт өгөхгүй байгаа нь хэрэгжих үндэслэлийг бууруулж байгаа, хөрөнгө, санхүүгийн нөөцийг төлөвлөөгүй, эх үүсвэргүйгээс зарим зорилт, арга хэмжээний хэрэгжилт хангалтгүй, зарим арга хэмжээний хүрэх үр дүн, хэрэгжилтийг үнэлэх шалгуурыг тодорхой томъёолоогүйгээс тэдгээрийн гүйцэтгэлийг тооцох, үнэлж дүгнэхэд бэрхшээл үүссэн гэсэн дүгнэлтийг хийсэн байна.
Монгол Улсын эдийн засаг, нийгмийг 2014 онд хөгжүүлэх үндсэн чиглэлийн биелэлтийг Улсын Их Хурлын чуулганы хуралдааны дэгийн тухай хуулийн 46 дугаар зүйлийн 46.5-д заасны дагуу Улсын Их Хурлын байнгын хороод хуралдаанаараа хэлэлцэж, санал дүгнэлтээ Эдийн засгийн байнгын хороонд ирүүлсэн юм.
Байгаль орчин, хүнс, хөдөө аж ахуйн байнгын хороо байгаль орчин, хүнс, хөдөө аж ахуйн салбарт төлөвлөсөн арга хэмжээний биелэлт хангалтгүй, зорилт, арга хэмжээг хэрэгжих хугацаа, санхүүгийн эх үүсвэртэй уялдуулан төлөвлөөгүй гэсэн дүгнэлт гаргасан бол Нийгмийн бодлого, боловсрол, соёл, шинжлэх ухааны байнгын хорооны хуралдаанаас Үндсэн чиглэлийн биелэлтийг хангалтгүй гэж дүгнэн зорилт, арга хэмжээг төлөвлөх, хэрэгжүүлэх, биелэлтийг дүгнэх, хариуцлага тооцдог аргачлал, стандартыг шинэчлэх тухай Засгийн газарт үүрэг өгөх, хэрэгжих боломжтой, бодитой ажлыг тусгах зэрэг саналуудыг гаргасан байна.
Төсвийн байнгын хорооны санал, дүгнэлтэд макро эдийн засгийн бодлогын биелэлт 55.4 хувьтай гарсныг тэмдэглээд, цаашид Үндсэн чиглэлд Засгийн газрын үйл ажиллагааны хөтөлбөрийг тусгах уу, эсхүл хамтарсанөөр хөтөлбөр хэрэгжүүлэхүү гэдгээ тохирох, хамтарсан Засгийн газраас 1.6 жилд хийхээр төлөвлөсөн ажлуудыг цаашид Үндсэн чиглэлд тусгах зэрэг санал гаргасныг дурдсан байна.
Төрийн байгуулалтын байнгын хорооны хуралдаанаасҮндсэн чиглэлийг боловсруулах, батлах, биелэлтийг дүгнэх одоогийн практик үйл ажиллагааг боловсронгуй болгох чиглэлээр холбогдох хууль тогтоомжид нэмэлт, өөрчлөлт оруулах саналыг 2015 оны хаврын ээлжит чуулганы хугацаанд багтаан бэлтгэж танилцуулахыг Төрийн байгуулалтын байнгын хороонд даалгасан заалтыг Үндсэн чиглэлийн биелэлттэй холбогдуулан авах арга хэмжээний тухай Улсын Их Хурлын тогтоолын төсөлд тусгуулах санал оруулахаар шийдвэрлэжээ.
Хууль зүйн байнгын хороо хөгжлийн бодлогын баримт бичгийг төлөвлөх, боловсруулах, батлах, хэрэгжилтэд хяналт-шинжилгээ, үнэлгээ хийх нэгдсэн арга зүй, стандартыг хэрэгжүүлэх, Аюулгүй байдал, гадаад бодлогын байнгын хорооны хуралдаанаас байлдааны галт хэрэгслийн хадгалалт, хамгаалалтад шаардлагатай төсөв, зардлыг Засгийн газрын тусгай сангийн тухай хуульд нэмэлт, өөрчлөлт оруулах замаар шийдвэрлэх, энхийг сахиулах ажиллагаанд аль болох олон албан хаагчийг хамруулах бодлого барих, гадаад өр, зээлийн хэмжээ эдийн засгийн аюулгүй байдалд нөлөөлж болзошгүй түвшинд хүрч байгаад анхаарах, Гадаад хэргийн яам мэргэшсэн дипломат бэлтгэх асуудалд онцгой анхаарч үндсэн чиглэлд тусгах, гадаадад амьдарч байгаа иргэдийнхээ эрх ашгийг хамгаалахад анхаарах, тэдний эх орондоо зорчих асуудлыг хялбаршуулсан журмаар шийддэг байх зэрэг саналыг тус тус гаргасан байна.
Байнгын хороодоос ирүүлсэн дээрх санал, дүгнэлтийг Эдийн засгийн байнгын хорооны хуралдаанаар хэлэлцээд Улсын Их Хурлын чуулганы хуралдааны дэгийн тухай хуулийн 46 дугаар зүйлийн 46.4, Хууль, Улсын Их Хурлын бусад шийдвэрийн төсөл боловсруулах, өргөн мэдүүлэх журмын тухай хуулийн 22 дугаар зүйлийн 22.2 дахь хэсэгт заасныг үндэслэн Монгол Улсын эдийн засаг, нийгмийг 2014 онд хөгжүүлэх үндсэн чиглэлийн биелэлттэй холбогдуулж Улсын Их Хурлаас гаргах тогтоолын төслийг боловсруулан чуулган нэгдсэн хуралдаанд танилцуулахаар тогтлоо хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.
