Монгол Улсын Ерөнхий сайд Ч.Сайханбилэг Засгийн газрын зарим гишүүнийг томилох, үүрэгт ажлаас нь чөлөөлөх тухай Улсын Их Хурлын тогтоолын төслийг өнөөдөр /2014.12.05/ орой Улсын Их Хурлын даргад өргөн барьсныг холбогдох байнгын хороодын хуралдаанаар хэлэлцлээ.

Төрийн байгуулалтын байнгын хорооны хуралдаан 21 цаг 40 минутад 73.7 хувийн ирцтэй эхэлж, Засгийн газрын гишүүн, Монгол Улсын Шадар сайдаар У.Хүрэлсүхийг, Засгийн газрын гишүүн, Монгол Улсын сайд, Засгийн газрын Хэрэг эрхлэх газрын даргаар С.Баярцогтыг, Засгийн газрын гишүүн, Монгол Улсын сайдаар М.Энхсайханыг томилох асуудлыг хэлэлцэв. Монгол Улсын Ерөнхий сайд Ч.Сайханбилэг нэр дэвшигчдийн талаар байнгын хорооны хуралдаанд танилцуулсан юм. Байнгын хорооны гишүүдээс асуулт, санал гараагүй тул Засгийн газрын гишүүдийг томилох санал хураалтыг нэр дэвшигч тус бүрээр явуулахад байнгын хорооны хуралдаанд оролцсон гишүүд нэр дэвшигч У.Хүрэлсүх, М.Энхсайхан нарыг зуун хувийн саналаар, нэр дэвшигч С.Баярцогтыг 93.3 хувь нь дэмжлээ.

Харин Эдийн засгийн байнгын хорооны хуралдаанаар Засгийн газрын гишүүн, Аж үйлдвэрийн сайдаар Д.Эрдэнэбат, Засгийн газрын гишүүн, Уул уурхайн сайдаар Р.Жигжид, Засгийн газрын гишүүн, Эрчим хүчний сайдаар Д.Зоригт, Засгийн газрын гишүүн, Зам тээврийн сайдаар Н.Төмөрхүү, Засгийн газрын гишүүн, Барилга хот байгуулалтын сайдаар Д.Цогтбаатарыг томилох асуудлыг хэлэлцсэн юм. Нэр дэвшигч Д.Эрдэнэбат байнгын хорооны хуралдаанд оролцсон гишүүдийн 92.3, нэр дэвшигч Р.Жигжид 92.9, Д.Зоригт 100, Н.Төмөрхүү 92.9, Д.Цогтбаатар 100 хувийн саналаар дэмжигдлээ. Мөн Хууль зүйн байнгын хорооны хуралдаанаар Засгийн газрын гишүүн, Хууль зүйн сайдаар Д.Дорлигжав, Төсвийн байнгын хуралдаанаар Засгийн газрын гишүүн, Сангийн сайдаар Ж.Эрдэнэбатыг томилох асуудлыг хэлэлцээд 100 хувийн саналаар дэмжив.

Байгаль орчин, хүнс, хөдөө аж ахуйн байнгын хорооны хуралдаанаар Засгийн газрын гишүүн, Байгаль орчин, ногоон хөгжил, аялал жуулчлалын сайдаар Д.Оюунхорол, Засгийн газрын гишүүн, Хүнс, хөдөө аж ахуйн сайдаар Р.Бурмааг томилох асуудлыг хэлэлцэж, байнгын хорооны хуралдаанд оролцсон гишүүд нэр дэвшигчдийг 100 хувийн саналаар дэмжлээ. Нийгмийн бодлого, боловсрол, соёл, шинжлэх ухааны байнгын хорооны хуралдаанаар Засгийн газрын гишүүн, Боловсрол, соёл, шинжлэх ухааны сайдаар Л.Гантөмөр, Засгийн газрын гишүүн, Хүн амын хөгжил, нийгмийн хамгааллын сайдаар С.Эрдэнэ, Засгийн газрын гишүүн, Хөдөлмөрийн сайдаар С.Чинзоригийг томилох асуудлыг хэлэлцсэн юм. Нэр дэвшигч Л.Гантөмөрийг 93.3 хувийн, нэр дэвшигч С.Эрдэнэ, С.Чинзориг нарыг 100 хувийн саналаар байнгын хорооны гишүүд дэмжлээ. Түүнчлэн Аюулгүй байдал, гадаад бодлогын байнгын хороо Засгийн газрын гишүүн, Гадаад харилцааны сайдаар Л.Пүрэвсүрэнг томилох тухай асуудлыг хэлэлцэж, нэр дэвшигч Л.Пүрэвсүрэнг байнгын хорооны гишүүдийн 93.8 хувийн саналаар дэмжлээ.

Харин Засгийн газрын гишүүн, Батлан хамгаалахын сайд, Засгийн газрын гишүүн, Эрүүл мэнд, спортын сайд нарыг томилуулах асуудлыг УИХ-д өргөн мэдүүлэхгүй байсан тул эдгээр сайд нарыг томилох асуудал байнгын хороодоор хэлэлцэгдсэнгүй. 

Засгийн газрын зарим гишүүнийг томилох асуудлыг чуулганы нэгдсэн хуралдаанаар удахгүй хэлэлцэж шийдвэрлэх юм гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.