Өнгөрөгч долоо хоногт УИХ-ын чуулганаар хүлээлт үүсгэсэн олон хуулийн төслүүдийг хэлэлцлээ. Тодруулбал, хоёр жил яригдсан Гэр бүлийн тухай хуулийн шинэчилсэн найруулга, Соёлын тухай, Хүүхэд харах үйлчилгээний тухай хуулийн төслүүд анхны хэлэлцүүлэгт орсон юм. 2012 оны Сонгуулийн дараагаас яригдаж эхэлсэн Хүүхэд харах үйлчилгээний тухай хуулийг Ерөнхийлөгч санаачлан эмэгтэй гишүүд хоёр жилийн хугацаанд хэлэлцүүлэгт бэлтгэн өргөн барилаа.
Хүүхдээ хараад гэртээ сууж байгаа эхчүүд мөн цэцэрлэг хүрэлцээгүйн улмаас гэртээ цоожтой үлддэг 80 мянган хүүхдийн асуудлыг шийдэх уг хуулийн төслийн анхны хэлэлцүүлгийг пүрэв гарагт хийж УИХ-ын холбогдох байнгын хороонд шилжүүлэв. Тэгвэл, баасан гарагийн хуралдаанаар Төрөөс хүн амын хөгжлийн талаар баримтлах цогц бодлогын тухай УИХ-ын тогтоолын төслийг хэлэлцэх эсэх асуудлаар хуралдав.
Төсөл санаачлагчийн илтгэлийг УИХ-ын гишүүн, БОНХ-ийн сайд С.Оюун танилцуулж, харин ХАХНХ-ын сайд С.Эрдэнэ гишүүдийн асуултад хариулав. Монгол Улсын төрөөс хүн амын хөгжлийн талаар баримтлах бодлогод хийсэн дүн шинжилгээгээр энэхүү бодлогын зорилго, хүрэх үр дүн, хэмжих хэмжүүрүүд тодорхой бус гэсэн дүгнэлт гарсан байна.
Учир нь бодлогод туссан асуудлуудын салбар дундын зохицуулалтыг зааж өгөөгүй, бодлогын зорилго, зорилтууд нь хэт ерөнхий туссанаас бодлогыг бодитойгоор үнэлж, дүгнэх боломжгүй байгаа аж. Үүний үндсэн учир шалтгаан нь тус бодлого үндэслэлгүй, нөхцөл байдлын дүн шинжилгээгүйгээр боловсруулагдсанаас үүдэлтэй гэж төсөл санаачлагч үзсэн байна.
Оны бодлогын зорилтыг Монгол Улсын хүн амын одоо, ирээдүйн чиг хандлага, хэтийн тооцоололд нөхцөл байдлын шинжилгээ хийлгүйгээр тодорхойлсон нь бодлого дөнгөж батлагдсаны дараахнаас эхэлсэн хүн ам зүйн шилжилтийн асар том үйл явдал болох хүн ам зүйн цонх үеийг тусгаагүй байгаа тул бодлого хүн ам зүйн цонх үед тохиох хүн амын асуудлыг бүрэн хамарч, тулгамдсан асуудлуудыг нийгэм-эдийн засгийн хөгжлийн явцад харилцан уялдаатайгаар цогц байдлаар шийдвэрлэхээр төсөлд тусгажээ.
Хэлэлцэх асуудалтай холбогдуулан С.Дэмбэрэл, С.Бямбацогт, Д.Оюунхорол, Г.Уянга, Н.Батцэрэг нарын гишүүд асуулт асуулаа. Гишүүд хүн ам зүйн бодлогын учир дутагдалтай тал тэр дундаа шилжилт хөдөлгөөний асуудлыг хэрхэн шийдэх, мөн нөхөн үржихүйн бодлого учир дутагдалтай байгааг шүүмжилсэн юм. Төрөөс эхчүүдийг дэмжих талаар ямар бодлого барих, хүн амын эрүүл аюулгүй орчинд амьдрах нөхцөл бололцоог хэрхэн бүрдүүлэх вэ гэсэн асуудлыг хөндөж байв.
Гишүүдийн асуултад ХАХНХ-ын сайд С.Эрдэнэ “Төрөөс хүн амын хөгжлийн талаар баримтлах цогц бодлогыг боловсруулахдаа хүн амын хөгжлийн эрх зүйн цоо шинэ орчин бүрдүүлэх зорилтыг тусгасан бөгөөд энэ бүхэнд суурилсан эдийн засгийн бодлого явах ёстой. Мөн хөдөө орон нутаг, нийслэлд амьдарч байгаа иргэдийн амьдралын чанар адил байх, цаашлаад хөдөө орон нутгийн иргэдийн амьдрал хотын иргэдийн амьдралаас давуу байх асуудал нийгмийн зөв тогтолцоог бүрдүүлснээр бий болно гэж харж байгаа. Бодлогын хүрээнд 50 гаруй зорилтыг тусгасан. Энэ нь салбар дундын төвшинд үндэсний хэмжээнд хэрэгжүүлэх хүн амын хөгжлийн суурь цогц бодлого юм.
Өмнө нь материаллаг тал руу хэт анхаарч, хүн амын хөгжлийн бодлогыг орхигдуулж ирсэн. Үүнийг яаж богино хугацаанд нөхөх, хүн амын цонх үед хэрхэн оновчтой хэрэгжүүлэх нь чухал гээд, хүн амын цонх үед бодлогоо зөв боловсруулах юм бол хөгжлийг хурдасгах боломжийг бий болгодог практикийг бусад улс орны жишээн дээрээс харж болно. Ялангуяа бүсчилсэн хэлбэрээр хүн амын амьжиргааны чанарын асуудлыг тавих ёстой” гэсэн хариулт өгсөн юм. Ийн хуралдаанд оролцсон гишүүдийн 68.6 хувь нь хэлэлцэхийг дэмжиж холбогдох байнгын хороонд шилжүүллээ.
Мөн энэ өдрийн хуралдаанаар Төрөөс шинжлэх ухаан технологийн талаар баримтлах бодлогыг шинэчлэн батлах тухай, Гэр бүлийн тухай хуулийн шинэчилсэн найруулгын анхны хэлэлцүүлгийг тус тус хийж холбогдох байнгын хороонд шилжүүллээ. Гэр бүлийн тухай хуулийн шинэчилсэн найруулгаар гишүүд асуулт асуугаагүй юм. Баасан гарагийн чуулганы үдээс хойшхи хуралдаанаар Засгийн газрын гишүүний мэдээллийг сонсох байсан ч МАН-ын Удирдах зөвлөл, бүлгийн хуралдаан давхацсан учраас хуралдсангүй.
Эх сурвалж: mglradio.com
