Энэ арваннэгдүгээр сард манай улсад томоохон үйл явдлууд тохиосон сар болж байна. Хамгийн гол дуулиан бол УИХ-ын гишүүн Д.Хаянхярваа нарын нэр бүхий 28 гишүүний өргөн барьсан Монгол Улсын Ерөнхий сайдыг огцруулах тухай саналыг хэлэлцэв. Нийт гишүүдийн 54.5 хувь буюу олонхийн саналаар түүнийг огцруулах шийдвэр гаргасан. Ингэснээр Шинэчлэлийн хэмээн нэрлэгдсэн засаг огцорч, шинээр засгийн газар бүрдүүлэх болоод байна. Мөн УИХ-ын намрын чуулганаар Засгийн газрын бүтцэд зарим нэг өөрчлөлт оруулсан. Тухайлбал, Сангийн яам, Эдийн засгийн хөгжлийн яамыг нэгтгэн Сангийн яам, Уул уурхайн яам, Эрчим хүчний яамыг нэгтгэн Геологи, уул уурхай, эрчим хүчний яам, Барилга хот байгуулалтын яам, Зам тээврийн яамыг нэгтгэн Дэд бүтцийн хөгжлийн яам болгон өөрчилж нийт 13 яам, 11 тохируулагч агентлаг, 19 хэрэгжүүлэгч агентлагтай ажиллахаар болсон.
Тэгвэл шинэ бүтэц, бүрэлдэхүүнтэй ажиллах Засгийн газраас бизнес эрхлэгчид юуг хүсч, хүлээж, ямар асуудал шийдүүлэхийг хүсч байгаа талаар бизнесчдээс тодрууллаа.
- “Авто-Ойл” ХХК-ийн гүйцэтгэх захирал Б.Ганбаатар: Гаалийн болон бусад татварын таатай орчин бүрдүүлэх хэрэгтэй байна. Манай компаний хувьд арав гаруй жил татвараа цаг тухайд нь төлсөн. Энэ хугацаанд татварын нөхцөл л хүнд тусч байна. мөн Замын-Үүдээр ч юмуу хилээр зарим хувь хүмүүс, албан байгууллагууд бараа бүтээгдэхүүнээ нууцаар хил нэвтрүүлж, татвар төлдөггүй. Тиймээс тэд бараагаа бусдаас хямд худалддаг. Гэтэл хууль, журмын дагуу татвараа төлсөн бусад нь тэднээс илүү үнэтэй худалдах болдог. Иймэрхүү байдлыг мөн зохицуулах шаардлагатай байна.
- “Женерал Электрик” компанийн гүйцэтгэх захирал Ц.Түмэнцогт: Ажиллах хүчний 75 хувийг хувийн компаниуд гаргаж байна. Энэ бол том тоо. Энэ нь хувийн хэвшлийн гүйцэтгэх үүрэг хэр том болсныг харуулдаг. Эрсдлийн талбар дээр хувийн хэвшлийнхэн үлдлээ гэдэгтэй санал нэг байна. Алдагдлаа хүлээж, ачаагаа тэд үүрээд, өмнөх ажлаа хийгээд л явж байна. Цаашид хувийн хэвшлээ дэмжих, нийгмийн нэр хүнд талаас нь өөрөөр харж үзэх цаг болсон. Нэг хэсэг хувийн хэвшлээ хавчих, шахан гадуурхах үзэгдэл ил, далд байсан. Ашиг хонжоо хайсан гэдэг ч юм уу тэр талаас нь татвар, мэргэжлийн хяналт нь дарамтлах үе гарч байсныг үгүйсгэхгүй.
Бусад улс хувийн хэвшлээ ажил олгогч, эрсдлийг үүрдэг, баялаг бий болгогч, бүтээн байгуулагч, татварын орлогыг гол бүрдүүлэгч гэж хардаг. Манайд энэ холбоо үгүйлэгдэж байна. Мөн манай улс бусад оронтой харьцуулахад ойлгомжтой татварын системтэй болох ёстой.
Тиймээс төр, засгийн зүгээс эдийн засаг хүндрэлтэй байгаа үед хувийн хэвшлээ дэмжиж, сонсох нь үр дүнтэй. Ингэснээр гарч буй шийдвэр биелэлээ олж, бодит үр дүн гарна. Энэ нь нийт эдийн засагт эерэг нөлөө үзүүлнэ. Мөн хүлээгдэж байгаа төслүүд эрт хэрэгжих нөхцлийг бүрдүүлэх сайн талтай.
- “Ажнай” корпорацийн Дэд ерөнхийлөгч Д.Дагвадорж: Сайханбилэг ерөнхий сайд болвол хуучин засгийн газрын хүн учир хуучин засаг, тогтолцоонд өөрчлөлт орохгүй. Гарын алга, ар тал л гэсэн үг. Ингэж ард түмнийг хуурах байсан юм бол яах гэж хуучин засаг унагах хэрэггүй байсан юм. Ер нь энэ үүргийг Амаржаргалд өгөх ёстой байсан юм.
- “Урбанек” ХХК-ийн Ерөнхий захирал Б.Лхагважав: Ил, тодын хуулийн асуудал, санхүүгийн эрх чөлөө гээд олон асуудал шийдэж өгөх, шийдэх эхлэлийг нь тавих хэрэгтэй. Өмнө нь 1992, 1997, 2009 онд бид хямралд өртөж байсан. Гэвч тухайн үед засгийн дарга нь эдийн засагч хүн байсан учир хямралыг даваад гарч байсан юм. Харин одоогийн хямралыг ийм мэдлэгтэй, чадвартай хүн л давна.
- Монголын бизнесийн зөвлөлийн дарга Б.Бямбасайхан:Шинэ засаг бүрдэхдээ хамгийн гол нь зөв баг томилох байх гэсэн хүлээлт үүссэн. Ер нь компаниуд бизнес төлөвлөгөөгөө ч хийж чадахгүй, бүх юм хүлээлтийн байдал руу орчихлоо. Бизнесчүүд том төслүүдээ шийдээд хурдан явуулаач гэж хүсч байна. Том төслүүдийн араас хөрөнгө оруулалт орж ирээд шинэ ажлын бий болно, үүнийг дагаад компаниуд ажилтай, орлоготой болж ирнэ. Тэр хэрээр макро эдийн засгийн орчин тогтворжино. Мөн төр хувийн бизнестэйгээ өрсөлдөхөө болих хэрэгтэй.
- “Их биндэр хайрхан” ХХК-ийн ерөнхий захирал Д.Адъяахүү: Улс орны хөгжил цэцэглэлтэнд хэрэгтэй шинэ технологи оруулж ирэх, үйлдвэрлэл үйлчилгээ явуулах, татвараас хөнгөлөх, чөлөөлөх хэрэгтэй байна. Төрийн аливаа байгууллагаас үйлчилгээ авахын тулд төрийн үйлчилгээг бидэнд хүргэдэг шат, дамжлага, бичиг цаасаа багасгах хэрэгтэй байна. Тэр олон гарын үсэг хасагдаж цөөрч байгаа гэх боловч хүнд суртал арилахгүй байна. Засгийн газрын үйл ажиллагаа нээлттэй, чөлөөтэй болвол хувийн хэвшлийнхэн улс орны хөгжлийг аваад л явчихна.
http://www.mongolchamber.mn/
