Улсын Их Хурлын Төсвийн байнгын хорооны өнөөдрийн /2014.11.12/ хуралдаанаар Монгол Улсын 2015 оны төсвийн тухай, Нийгмийн даатгалын сангийн 2015 оны төсвийн тухай, Хүний хөгжил сангийн 2015 оны төсвийн тухай хуулийн төслүүдийн хоёр дахь хэлэлцүүлгийг хийлээ.
Тус байнгын хороо өмнөх хуралдаанаараа дээрх хуулийн төслүүдийг Байнгын хороо болон Улсын Их Хурлын чуулганы нэгдсэн хуралдаанаар хэлэлцүүлэх бэлтгэл хангах, санал, дүгнэлтийн төсөл боловсруулах үүрэг бүхий ажлын хэсгийг байгуулсан билээ.
Хуралдааны эхэнд ажлын хэсгийн ахлагч Улсын Их Хурлын гишүүн Б.Болор ажлын хэсгийн боловсруулсан санал дүгнэлтийг танилцуулав. Тэрээр, ажлын хэсэг 7 удаагийн хуралдаанаараа Монгол Улсын 2015 оны төсвийн төслийн орлого, зарлага, хөрөнгө оруулалтын төсөл арга хэмжээ, Засгийн газрын тусгай сангуудын үйл ажиллагаа, төсөвт байгууллагын бүтэц, орон тоо, зорилтот хөрөнгө оруулалтын төсөл, арга хэмжээ бүрийн талаар дэлгэрэнгүй тооцоо судалгааг холбогдох байгууллагаас гаргуулан авч ажлын хэсгийн албан хэрэгцээнд ашигласан тухай гишүүдэд сонсгов.
Мөн Үндэсний аудитын газраас ирүүлсэн санал, Улсын Их Хурлын бүх Байнгын хороод, Төсвийн зарлагын хяналтын дэд хороо, Улсын Их Хурал дахь Ардчилсан нам, Монгол Ардын нам, “Шударга ёс” эвслийн бүлгүүдээс Монгол Улсын 2015 оны төсвийн төслийг хэлэлцээд гаргасан санал, дүгнэлт, зарчмын зөрүүтэй саналын томьёолол тус бүрийг нэг бүрчлэн хэлэлцсэн байна.
Ингэхдээ 2015 оны төсвийн төслийн зарлага, санхүүжилтийг оновчтой болгох үүднээс зарлагыг нэмэгдүүлэхгүй бууруулах зарчмыг баримталж, төсвийн төсөлд хэрэгжүүлэх шаардлагатай төсөл, арга хэмжээнүүдийг эрэмбэлэн 2015 онд санхүүжүүлэх хөрөнгө оруулалтын төсөл, арга хэмжээнүүдийн талаар тооцоо, судалгаа гаргахдаа ажлын хэсгээс дараах зарчмыг баримталсан гэв. Үүнд:
Засгийн газрын тусгай сангуудын урсгал зардлыг бууруулах, гадаад зээлийн ашиглалтыг бууруулах, шинээр гаргах бондын хүүгийн зардлыг бууруулах.
Боловсрол, эрүүл мэндийн салбараас бусад салбарын тоног төхөөрөмж, их засварын зардлыг 100 хувь хасаж, боловсрол, эрүүл мэндийн салбарынхыг 30 хувиар бууруулах.
Төсвийн ерөнхийлөн захирагчдын урсгал зардлыг арга хэмжээ, эдийн засгийн ангиллаар бууруулах.
Техник, эдийн засгийн үндэслэл, зураг төсөл, зөвлөх үйлчилгээний зардлыг 2015 онд 100 хувь хасах, орон сууцны дэмжлэг олгох хэлбэрээр төсөлд тусгагдсан зардлыг 100 хувь хасах.
Төсвийн тухай хуульд тусгагдан хэрэгжиж эхэлсэн боловч өнгөрсөн онуудын төсөвт тусгагдаагүй орхигдсон зарим шаардлагатай төсөл, арга хэмжээг 2015 оны төсөвт тусган санхүүжүүлэх.
Дэд бүтцийн чиглэлийн зарим хөрөнгө оруулалтын төсөл, арга хэмжээг Хөгжлийн банкны эх үүсвэрээр санхүүжүүлэхээр шилжүүлэх.
Улсын төсвийн хөрөнгөөр 2015 онд санхүүжүүлэх хөрөнгө оруулалтын төсөл, арга хэмжээний жагсаалтад Улсын Их Хурлын 2014 оны 30 дугаар тогтоолын хавсралт дахь төсөл, арга хэмжээнүүдийг тусгах нь зүйтэй гэсэн зарчмуудыг тус тус баримталсан байна.
Уг танилцуулгын дараа ажлын хэсгээс гаргасан зарчмын зөрүүтэй саналын томьёоллыг санал тус бүрээр санал хураалгав. Санал хураах явцад гишүүдийн зүгээс төдийлөн асуулт, тодруулга гараагүй тул хуралдаан шуурхай явагдаж, зарчмын зөрүүтэй саналуудыг хуралдаанд оролцсон гишүүдийн олонх дэмжсэнээр чуулганы нэгдсэн хуралдаанаар хэлэлцүүлэхээр тогтлоо хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
