2013 оны 12 сарын 6-нд Монгол Улсын Үндсэн хуулийн цэцийн Тамгын газраас УИХ-ын гишүүн С.Дэмбэрэлд тавьсан хүсэлтийнх нь дагуу 4/379 тоот албан хариу иржээ. Уг албан бичгээр Үндсэн хуулийн цэцэд маргаан хянан шийдвэрлэх ажиллагаа үүсгэхээс татгалзах тухай Үндсэн хуулийн цэцийн гишүүний 2013 оны 10 дугаар сарын 7-ны өдрийн 86-р тогтоолын хуулбарыг баталгаажуулан хүргэжээ. Энэхүү тогтоолоор Нийслэлийн Баянзүрх дүүргийн иргэн А.Мөнхбатаас Үндсэн хуулийн цэцэд хандаж гаргасан мэдэгдлийн дагуу УИХ-ын гишүүн С.Дэмбэрэл нь МҮХАҮТ-ыг даргалж байгаа нь Үндсэн хуулийн заалтуудыг зөрчиж байгаа эсэхийг тогтоосон байна. Цэцийн гишүүн энэ асуудалд дараах зүйлсийг үндэслэл болгожээ. Үүнд:

 

Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай 2012 оны 1 дүгээр сарын 19-ний өдрийн хуулийн 18 дугаар зүйлийн 18.2-т, УИХ-ын гишүүн хуулиар зөвшөөрсөн ажил давхар эрхэлж болно.

Шинэчлэн найрууулсан Монгол Улсын Их Хурлын тухай 2006 оны 1 дүгээр сарын 26-ны өдрийн хуулийн 36 дугаар зүйлийн 36.1.3-т, гишүүн бүрэн эрхийнхээ хугацаанд төрийн бус байгууллагын сонгуульт албан тушаал хавсран гүйцэтгэх эрхтэй болохыг хуульчилжээ.

2002 оны 7 дугаар сарын 4-ний өдрийн хуулиар өөрчлөлт оруулсан Худалдаа, аж үйлдвэрийн танхимын тухай 1995 оны 10 дугаар сарын 24-ний өдрийн хуулийн 3 дугаар зүйлийн 1 дэх хэсэгт зааснаар танхим нь аж ахуйн нэгж, байгуулагуудаас худалдаа, үйлдвэрлэл эрхлэхтэй холбогдсон нийтлэг эрх, хууль ёсны ашиг сонирхлыг хамгаалах болон худалдаа үйлдвэрлэлийг дэмжих зорилгоор байгуулсан ашгийн төлөө бус хуулийн этгээд мөн болохыг тодорхойлсон байна.

Иймд УИХ-ын гишүүн С.Дэмбээрэл нь хуулиар зөвшөөрсөн ажил давхар эрхэлж байх тул Үндсэн хуулийн цэцэд хянан шийдвэрлэх ажиллагаа үүсгэх үндэслэлгүй байна гэжээ