2014 оны төсвийн тухай хуулийн гурав дахь хэлэлцүүлгийг хийн, Төрөөс мөнгөний бодлогын талаар 2014 онд баримтлах үндсэн чиглэлийг баталлаа
УИХ-ын чуулганы өнөөдрийн /2013.11.14/ нэгдсэн хуралдаанаар Монгол Улсын 2014 оны төсвийн тухай хуулийн төслийг дагалдан өргөн мэдүүлсэн Төсвийн тогтвортой байдлын тухай хуульд өөрчлөлт оруулах тухай хуулийн төслийн хэлэлцэх эсэх асуудал үргэлжлүүлэн хэлэлцэв. Өмнөх хуралдаанаар энэ хуулийн төслийн талаар гишүүд асуулт асууж, хариултаа авсан байсан бөгөөд хэлэлцэх эсэх асуудлаар санал хураалт явуулав.Нэгдсэн хуралдаанд оролцсон гишүүдийн гуравны хоёроос доошгүй хувийн саналаар энэ хуульд нэмэлт, өөрчлөлт оруулж болохоор хууьчилсан байдаг бөгөөд хуралдаанд оролцсон гишүүдийн гуравны хоёр дэмжсэн санал өгөөгүй учир хуулийн төслийг буцаалаа.
Энэ асуудлын дараа мөн Монгол Улсын 2014 оны төсвийн тухай хуулийн төслийг дагалдан өргөн мэдүүлсэн Монгол Улсын нэгдсэн төсвийн 2014 оны төсвийн хүрээний мэдэгдэл, 2015-2016 оны төсвийн төсөөллийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийж дуусган Төсвийн байнгын хороонд шилжүүлсэн.
Түүнчлэн “Монгол Улсын 2014 оны төсвийн тухай хууль батлагдсантай холбогдуулан авах зарим арга хэмжээний тухай” УИХ-ын тогтоолын төслийн анхны хэлэлцүүлгийг хийн Төсвийн байнгын хороогоор дэмжигдсэн болон дэмжлэг аваагүй санал тус бүрээр санал хураалт явуулан эцсийн хэлэлцүүлэгт бэлтгүүлэхээр Төсвийн байнгын хороонд шилжүүлэв.
Энэ өдрийн хуралдаанаар хэлэлцсэн дараагийн асуудал нь Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийн гурав дахь хэлэлцүүлгийг хийлээ.
Төсвийн байнгын хороо хуулийн төслүүдийн гурав дахь хэлэлцүүлгийг хийгээд Монгол Улсын нэгдсэн төсвийн орлого талд навигацын орлогыг 1З.0 тэрбум төгрөг, газрын тосны орлогыг 7.0 тэрбум төгрөгөөр тус тус нэмэгдүүлж, Барилга, хот, байгуулалтын сайдын багц дахь төсөвт байгууллагын өөрийн орлогыг 1.1 тэрбум төгрөгөөр бууруулахаар оруулж иржээ.
Улсын төсвийн урсгал зардлыг өмнөх оны түвшинг харгалзан зардлын тодорхой зүйл анги тус бүрээр 5-20 хувиар төсвийн ерөнхийлөн захирагч нарын урсгал зардлаас хэмнэхээр тооцож нийт 20.2 тэрбум төгрөгөөр урсгал зардлыг бууруулж тооцсон байна.
Төслийн хоёр дахь хэлэлцүүлгээр олонхийн дэмжлэг авсан төсвийн урсгал зардал нэмэгдүүлэх болон төсвийн ерөнхийлөн захирагч хооронд зохицуулалт хийх, төсвийн ерөнхийлөн захирагчийн төсвийн багц дотор зохицуулалт хийх, төсвийн хөрөнгө оруулалтын зардлыг нэмэгдүүлэх, бууруулах саналуудын дагуу холбогдох өөрчлөлтүүдийг хийж төсвийн төсөлд тусгажээ.
Тухайлбал, Хөрөнгө оруулалтын зардалд 199.617.3 сая төгрөгийн төсөл, арга хэмжээг төсөлд нэмж, 129.381.0 сая төгрөгийн төсөл арга хэмжээг төслөөс хасжээ.
Дээрх өөрчлөлтүүдийг төсвийн төсөлд тусгаснаар Монгол Улсын нэгдсэн төсвийн нийт зардал 18.7 тэрбум төгрөгөөр нэмэгдэхээр байгаа юм байна.
Монгол Улсын Нэгдсэн төсвийн нийт орлого 6.883.9 тэрбум төгрөг буюу ДНБ-ний 33.6 хувь, нэгдсэн төсвийн нийт зардал 7.293.8 тэрбум төгрөгөөр буюу ДНБ-ний 35.6 хувь болж байна. Нэгдсэн төсвийн нийт алдагдал 409.9 тэрбум төгрөг буюу ДНБ-ний 2 хувьтай тэнцэхээр байгаа ажээ. Гишүүд байнгын хорооны санал, дүгнэлттэй холбогдуулан асуулт асууж дуусан дөрөв дэх хэлэлцүүлгийг хийхээр тогтлоо.
Үүний дараа “Төрөөс мөнгөний бодлогын талаар 2014 онд баримтлах үндсэн чиглэл батлах тухай” Улсын Их Хурлын тогтоолын төслийн эцсийн хэлэлцүүлгийг хийлээ. Тогтоолын төслийг УИХ-ын гишүүн, Эдийн засгийн байнгын хорооны гишүүн, тогтоолын төслийг хэлэлцүүлэгт бэлтгэх ажлын хэсгийн ахлагч С.Дэмбэрэл танилцуулж, асуултанд хариулав. Ингээд хуралдаанд оролцсон гишүүдийн олонхын саналаар тус тогтоолын төслийг баталлаа.
