Монгол Улсын Ногоон хөгжлийн дээд хэмжээний форум өнөөдөр /2013-11-13/ Төрийн ордонд боллоо.

 

Форумыг УИХ-ын гишүүн, Байгаль орчин, ногоон хөгжлийн сайд С.Оюун, Байгаль орчин, хүнс, хөдөө аж ахуйн байнгын хорооны дарга Г.Баярсайхан, НҮБ-ын Суурин зохицуулагч Сезин Синаноглу нар нээж, “Ногоон хөгжлийн талаар баримтлах Монгол Улсын үндэсний стратеги: өнөөгийн нөхцөл байдал, боломж, саад бэрхшээл сэдэвт илтгэлийг Байгаль орчин, ногоон хөгжлийн дэд сайд Б.Тулга, Монгол Улс болон Ногоон эдийн засаг, ногоон хөгжлийг дэмжихэд зориулсан /PAGE/ Ногоон Эдийн засгийн төлөөх Түншлэлийн түнш байгууллагуудыг төлөөлсөн нэгдсэн илтгэлийг Байгаль орчин, ногоон хөгжлийн яамны Цэвэр технологи, шинжлэх ухааны хэлтсийн дарга А.Энхбат  тавилаа.

 

Энэхүү дээд хэмжээний уулзалтад Улсын Их Хурал, Засгийн газрын гишүүд, яам, агентлаг, газрын дарга, мэргэжилтэн, аймаг, нийслэлийн засаг дарга, орлогч дарга нар болон олон улсын байгууллагын төлөөлөл оролцлоо. УИХ-ын гишүүн, УИХ дахь Ногоон бүлгийн ахлагч, Иргэний Зориг Ногоон Намын дарга С.Дэмбэрэл мөн уг форумд оролцож, үг хэлсэн байна.

 

Уг дээд хэмжээний уулзалтаар Монгол Улсын хөгжлийн төлөвлөлтийг ногоон эдийн засгийн тусламжтайгаар сайжруулах бололцооны талаар шийдвэр гаргагчид болон бусад оролцогч талуудын ойлголт мэдээллийг нэмэгдүүлэх харилцан ярилцлага өрнүүлсэн юм. Ингэснээр Монгол Улс PAGE буюу “Ногоон эдийн засгийн төлөөх Түншлэл”-ийн хүрээнд олон улсын хамтын ажиллагааг эхлүүлж, мөн УИХ-ын чуулганаар Ногоон хөгжлийн үзэл баримтлалын баримт бичгийг хэлэлцэх цаг үетэй тохируулан ногоон хөгжлийн асуудлыг хэлэлцэх боломжийг олгож байгаа юм байна.

 

Мөн энэхүү дээд хэмжээний уулзалтын үеэр Ногоон эдийн засгийн төлөөх Түншлэл PAGE-ийн дэмжлэгтэйгээр 2013 оны 11 дүгээр сарын 11-12-ны өдрүүдэд болох үндэсний чадавхийг хөгжүүлэх болон “Ногоон эдийн засгийн төлөөх Түншлэл”-ийн төлөвлөлтийн семинарын гол үр дүнгийн талаар танилцуулав.

 

Түншлэлийн зорилго нь Монгол Улсад Ногоон хөгжлийн стратегийг боловсронгуй болгон хэрэгжүүлэхэд дэмжлэг үзүүлэх явдал гэлээ. Мөн Түншлэлд үүсгэн байгуулсан гишүүд нь Монгол дахь НҮБ-ын Хөгжлийн хөтөлбөрийн газартай хамтран НҮБ-ын Суурин төлөөлөгчийн дэмжлэгтэйгээр ирэх зургаан сарын хугацаанд Түншлэлийн үйл ажиллагааг тодорхой болгох болон Ногоон хөгжлийн стратегийн баримт бичгийг сайжруулах чиглэлд нэлээд үйл ажиллагааг дэмжин хэрэгжүүлэх ажээ.

 

Түншлэлийн эхний шатанд PAGE буюу “Ногоон эдийн засгийн төлөөх Түншлэл”-ийн урт хугацааны үйл ажиллагааны хүрээнд уялдуулан зохицуулах төсөөллийг гаргасан Үндэсний хэмжээний Ногоон эдийн засгийн тайланг Засгийн газар, бусад сонирхогч талуудыг оролцуулан бэлтгэх юм байна гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.