11 дүгээр сарын 27-ны Лхагва гарагтБайгаль орчин, хүнс, хөдөө аж ахуйн байнгын хорооны хуралдаан 11.00 цагаас “Б” танхимд болж, “Агаарын тухай хуульд нэмэлт, өөрчлөлт оруулах тухай” хуулийн төслийг /Монгол Улсын Ерөнхийлөгчөөс өргөн мэдүүлсэн/ хэлэлцлээ. Байнгын хорооны хурлыг УИХ-ын гишүүн С.Дэмбэрэл удирдаж, хурал бүтэн цаг хагас үргэлжилж, олон асуулт гарч, хариу авч, санал шүүмжлэлүүд өрнөлөө. Хуралдааны төгсгөлд хуралдаан даргалагч, УИХ-ын гишүүн С.Дэмбэрэл ингэж дүгнэлээ.

•        Бид өнөөдөр маш чухал зүйл ярилцлаа. Тэр байтугай бид өнөөдөр орж ирсэн төслөөс ч хальсан, өргөн хүрээнд асуудлыг хөндлөө. Гэхдээ үнэхээр бидэнд тодорхой харагдсан зүйл бол Д.Арвин, Л.Эрдэнэчимэг нарын гишүүдийн хэлээд байгаа шиг нэг зүйл бодохгүй бол болохоо байсан байна. Өнөөдрийн оруулж ирж байгаа хуулийн төслийг би яриад, янзлаад, сайхан хууль болгочихож болно. Гэхдээ асуудал үлдэж байна. Өөрөөр хэлбэл УТАА ҮЛДЭЖ байна. Одоо хамгийн гол нь, энэ хуулиасаа гадна дараагийн байнгын хорооны хурал дээр, Г.Баярсайхан даргыг ирэхээр бид хамтраад нэг асуудлыг тавьмаар байна. Жишээлбэл, энэ агаарын тухай хуулинд өөрчлөлт оруулах тухай яримаар байна. Өнөөдрийн авсан хариултуудаас харахад хуулинд оруулах өөрчлөлтүүд маш их байна шүү дээ. Тэгж  байж л байдал өөрчлөгдөх юм байна. Энэ хуулинд өөрчлөлт оруулаад, бохирдол үүсгэж байгаа бусад эх үүсвэрүүдийн талаар нарийвчлан үзэж, эдгээрт зориулсан төрийн бодлого, хууль журмууд нь ямар байх юм бэ, Монгол улс өөрөө өмчлөлөө буюу санаачлагаа алдчихсан юм байна шүү дээ. Тэгээд Дэлхийн банк, энэ тэр гэсэн газраас мөнгө зээлж авчихаад, гадаадаас зуухнуудыг гадаадынханаар бэлэн мөнгөөр худалдаж авч, үнэгүй тараачихаад л, хуралдаад сууж байдаг. Ийм хөгийн юм байж болох уу? Тийм учраас саяны ярилцсаны дагуу, иж бүрэн цогц байдлаар асуудалд хандахыг та бүхнээс уриалж байна. Үнэхээр бид санаа зовж байгаа учраас энэ хууль явдгаараа яваад өнгөрсөн ч дээр нь олон хуульд, жишээлбэл, Яамдын эрх зүйн байдлын тухай хуулинд өөрчлөлт оруулах хэрэгтэй. Тухайн яамны чиг үүрэгт нь нийт үндэсний хэмжээнд гамшиг болсон асуудалтай тэмцэх чиг үүргийг бүгдэд нь тэнцүү оруулж, үүрэг болгож өгөх хэрэгтэй. Тэгэхээр, Батлан хамгаалах яам, Гадаад харилцааны яамны чиг үүрэгт ч агаарын бохирдолтой тэмцэх чиг үүрэг ноогдож эхэлнэ. Ингэсэн тохиолдолд Яамдуудын ажил, бодлогын уялдаа өөрийн эрхгүй сайжирна. Тэгээд үүнийгээ яаж сайжруулах юм бэ, институцүүд яаж оролцох вэ, зуухнаас гадна машины бохир утааг яах вэ, уурын зуухнуудыг яах вэ, бусад бохирдлын эх үүсвэр тус бүр дээр ямар ямар арга хэмжээнүүдийг хэн хэн авах вэ гэдгийг тодорхой болгож, иж бүрэн хандлагаар тэмцэх тийм л шаардлага тулгараад байна гэж ойлгогдлоо. Энэ тал дээр байнгын хорооны гишүүд та бүхэн саналаа маш зүйтэй хэлцгээлээ. Байгаль орчин, хүнс, хөдөө аж ахуйн байнгын хорооны энэ удаагийн хуралдаан дууссаныг мэдэгдэж байна.