Монгол Улсын Үндсэн хуулийн Гучин есдүгээр зүйлийн 2 дахь хэсэгт заасны дагуу Монгол Улсын Ерөнхийлөгчтэй зөвшилцсөний үндсэн дээр Засгийн газрын бүтцийн тухай, Засгийн газрын бүрэлдэхүүний тухай, Засгийн газрын тухай хуульд өөрчлөлт оруулах тухай хуулийн төслүүдийг “Төрийн захиргааны байгууллагын тогтолцоо, бүтцийн ерөнхий бүдүүвчийг батлах тухай” Улсын Их Хурлын тогтоолын төслийн хамт боловсруулан танилцуулж байна.
1. Засгийн газрын бүрэлдэхүүнд Монгол Улсын Ерөнхий сайд, Шадар сайд, Засгийн газрын Хэрэг эрхлэх газрын дарга болон дор дурдсан асуудал эрхэлсэн зэрэг нийт 19 гишүүн ажиллуулах саналтай байна. Тухайлбал,
Монгол Улсын хөгжилд чухал ач холбогдолтой, үндэсний хэмжээний бүтээн байгуулалтыг хамарсан тодорхой, томоохон төсөл, хөтөлбөрүүдийг хэрэгжүүлэх асуудал эрхэлсэн Монгол Улсын сайдыг Засгийн газрын бүрэлдэхүүнд ажиллуулах нь зүйтэй гэж үзлээ. Монгол Улсын сайд нь үндэсний хэмжээний томоохон төсөл, хөтөлбөрүүдийг хэрэгжүүлэхэд шаардагдах хөрөнгө оруулалтын асуудлыг шийдвэрлэж, төслийн хэрэгжилтийн явцыг бодлогын удирдамж, чиглэл, зохицуулалтаар байнга хангаж ажиллах бөгөөд гадаад, дотоодын хөрөнгө оруулагчдыг татах асуудлыг хариуцна. Ингэснээр эдгээр төсөл, хөтөлбөрүүдийн санхүүжилтийн асуудал шийдвэрлэгдэж, хэрэгжилтэд нь зохих үр дүн гарна гэж үзэж байна. Монгол Улсын сайдын эрхлэх асуудлын хүрээнд яам ажиллахгүй болно.
Засгийн газар нь 15 яамтай ажиллах бөгөөд үүнээс Байгаль орчин, аялал жуулчлалын яам, Гадаад хэргийн яам, Сангийн яам, Хууль зүйн яам ерөнхий чиг үүргийн яам байна. Аж үйлдвэрийн яам, Барилга, хот байгуулалтын яам, Батлан хамгаалах яам, Боловсрол, соёл, шинжлэх ухааны яам, Зам, тээврийн яам, Уул уурхайн яам, Хөдөлмөрийн яам, Хүн амын хөгжил, нийгмийн хамгааллын яам, Хүнс, хөдөө аж ахуйн яам, Эрчим хүчний яам, Эрүүл мэнд, спортын яам нь чиглэлийн яамд байна.
Монгол Улсын хуулийг биелүүлж, аж ахуй, нийгэм, соёлын байгуулалтыг удирдах нийтлэг чиг үүрэг бүхий, гүйцэтгэх эрх мэдлийн дээд байгууллага Засгийн газрын бодлого, үйл ажиллагаа тогтвортой байх нь ард түмний нийтлэг эрх ашигт нийцнэ. Тэр дундаа байгалийн баялаг, ашигт малтмалын салбарын орлогоос ихээхэн хамааралтай манай улсын эдийн засагт гадаадын хөрөнгө оруулалт их хэмжээгээр бууран, эдийн засгийн өсөлт саарч байгаа өнөө үед эдийн засгийг сэргээхэд улс төрийн тогтвортой байдал чухал нөлөө үзүүлнэ.
АНУ, ХБНГУ, БНСУ, Сингапур, Катар, Бразил зэрэг хөгжлийн хурд, эдийн засгийн өрсөлдөх чадвараараа дэлхийд тэргүүлж байгаа улсуудад Засгийн газрын бодлого, үйл ажиллагаа нь тогтвортой байдаг бөгөөд улс төрийн тогтвортой байдал нь Засгийн газар хэтийн болон дунд хугацааны хөгжлийн зорилтоо зөв тодорхойлж, үндэсний эдийн засгийн хязгаарлагдмал нөөцийг үр дүнтэй ашиглахад нь чухал нөлөө үзүүлж ирсэн байна. Харин манай улсын хувьд Засгийн газрын бодлого, үйл ажиллагаа тогтворгүй байгаа нь хөгжлийн боломж, нөхцөлөө бүрэн дүүрэн ашиглахад саад болж байна.
Шинэ Засгийн газрын бүтцийг боловсруулахдаа дээр дурдсан онцлог нөхцөл байдал, түүхэн уламжлал, хөгжлийн чиг хандлагыг харгалзсан бөгөөд яамдын чиг, үүргийн давхардлыг арилгаж, эрхлэх хүрээ, салбарыг оновчтой тогтоох, нөөцийг зөв хуваарилах, төрийн бодлого боловсруулах, түүний хэрэгжилтийг зохион байгуулах ажлыг чанартай, үр дүнтэй, шуурхай явуулах шаардлагыг үндэслэн зарим яамыг өөрчлөн байгуулахаар холбогдох хуулийн төсөлд тусгалаа. Тухайлбал,
- Зам, тээвэр, барилга, хот байгуулалтын яамыг Барилга, хот байгуулалтын яам болон Зам, тээврийн яам болгон хуваах нь зүйтэй гэж үзсэн. Ингэснээр барилгын болон зам, тээврийн салбарт төрөөс баримталж байгаа бодлогыг үр дүнтэй хэрэгжүүлэх, сүүлийн жилүүдэд цар хүрээ нь өргөжиж байгаа авто зам, хот байгуулалт, дэд бүтцийн хөгжлийн бүтээн байгуулалтын төсөл, хөтөлбөрүүдийг оновчтой удирдан зохион байгуулах боломж нэмэгдэнэ.
- Манай улсад хүнд болон хөнгөн үйлдвэрлэлийн бодлогын асуудлыг нэгтгэн хариуцсан чиглэлийн яам байхгүй байгааг өөрчилж, цаашид хүнд үйлдвэрлэлийг хөгжүүлэх асуудал, хөнгөн үйлдвэрлэлийн бодлогын асуудал, аж үйлдвэрийн паркийн асуудал, жижиг, дунд үйлдвэрийн хөгжлийн асуудал, экспорт, импортын асуудал, гадаад, дотоод худалдаа, үйлчилгээний бодлого, зохицуулалт, чөлөөт бүсийн хөгжлийн асуудлыг тус тус хариуцан ажиллах Аж үйлдвэрийн яамыг шинээр байгуулах нь зүйтэй гэж үзлээ. Энэ нь нэмүү өртөг шингээсэн эцсийн бүтээгдэхүүн үйлдвэрлэх цогцолбор үйлдвэрүүдийг барьж байгуулах замаар Монгол орныг аж үйлдвэржүүлэх үндэсний ашиг сонирхолд нийцэх юм.
- Уул уурхайн салбарын эзлэх хувь хэмжээ манай улсын эдийн засагт тогтмол өсөн нэмэгдэж байгаа өнөө үед тус салбарын бодлогыг боловсруулах, түүнийг хэрэгжүүлэх, нөөцийг оновчтой зөв удирдах асуудлыг тусгайлан хариуцсан Уул уурхайн яамыг дахин байгуулж ажиллуулах нь зүйтэй гэж үзлээ.
- Эдийн засгийн өсөлт, аж үйлдвэржүүлэх бодлого, хүн амын төвлөрөл, хотжих үйл явцтай холбогдон манай улсын эрчим хүчний хэрэглээ нэмэгдэх хандлагатай байна. Цаашид улам өсөн нэмэгдэж буй эрчим хүчний эрэлт, хэрэгцээгээ хангах зорилгоор эрчим хүчний шинэ эх үүсвэрийг бий болгох, сэргээгдэх эрчим хүчийг хөгжүүлэх асуудлыг бодлогын оновчтой, зөв төлөвлөлт, хуваарилалтаар хангаж, удирдах шаардлагатай байгаа тул Эрчим хүчний яамыг сэргээн байгуулж ажиллуулах санал боловсрууллаа.
- Боловсрол, шинжлэх ухаан болон соёл, урлагийг хөгжүүлэх, түүх, соёлын өвийг хамгаалах, сэргээх асуудлуудыг нэгтгэн нэг яаманд хариуцуулан ажиллуулах нь зүйтэй гэж үзэн, Боловсрол, соёл, шинжлэх ухааны яамыг байгуулахаар тусгалаа.
- Аялал жуулчлалыг хөгжүүлэх асуудал нь Монгол орны байгаль, цаг уурын өвөрмөц онцлог, газар нутгийн тогтоц, үндэсний өв, уламжлал, соёл, ёс заншил, түүх, дурсгалын үнэт зүйлстэй шууд холбоотой тул цаашид Байгаль орчин, аялал жуулчлалын яамыг байгуулан ажиллуулах нь зүйтэй гэж үзлээ.
- Нийтийн биеийн тамир, спортыг түгээн дэлгэрүүлэх, сурталчлах, түүгээр хичээллэх явдлыг дэмжих, амьдралын эрүүл, зөв хэвшилд сургах замаар хүн амыг эрүүлжүүлэх шаардлагатай байна. Нийтийн биеийн тамир, спорт болон хүн амын эрүүл мэндийн асуудлыг цаашид бодлого, зохицуулалтын хувьд нэгтгэн нэг яаманд харьяалуулан ажиллуулах нь зүйтэй гэж үзэн, Эрүүл мэнд, спортын яамыг байгуулахаар санал боловсрууллаа.
- Хүн амын хүнсний хангамж, хүнсний аюулгүй байдлыг хангах, мал аж ахуй болон газар тариаланг эрчимжүүлэн хөгжүүлэх шаардлагыг тус тус харгалзан Үйлдвэр, хөдөө аж ахуйн яамны суурин дээр Хүнс, хөдөө аж ахуйн яамыг байгуулж ажиллуулах нь зүйтэй гэж үзлээ.
- Чиг үүрэг, хариуцсан асуудлыг нь Байгаль орчин, аялал жуулчлалын яам, Боловсрол, соёл, шинжлэх ухааны яам, Эрүүл мэнд, спортын яам тус тус хариуцан ажиллахаар холбогдох хуулийн төслүүдэд тусгасан тул цаашид Соёл, спорт, аялал жуулчлалыг яамыг татан буулгана.
Засгийн газрын бүтэц, бүрэлдэхүүний тухай саналыг боловсруулахдаа төрийн бодлого боловсруулах, хэрэгжүүлэх чадавхийг нэмэгдүүлэх, нөөцийг зөв хуваарилах, хариуцлагын тогтолцоог бүрдүүлэх асуудалд онцгой анхаарсан болно.
2. Монгол Улсын Үндсэн хуулийн Гучин есдүгээр зүйлд заасан бүрэн эрхийнхээ дагуу Засгийн газрын бүтэц, бүрэлдэхүүний талаархи саналаа Улсын Их Хуралд өргөн мэдүүлж байгаатай холбогдуулан “Төрийн захиргааны байгууллагын тогтолцоо, бүтцийн ерөнхий бүдүүвчийг шинэчлэн батлах тухай” Улсын Их Хурлын тогтоолын төслийг боловсруулан танилцуулж байна.
Улсын Их Хурлаас 2012 оны 8 дугаар сарын 17-ны өдөр баталсан “Төрийн захиргааны байгууллагын тогтолцоо, бүтцийн ерөнхий бүдүүвч”-д өнгөрсөн хугацаанд 2013 онд 3 удаа, 2014 онд 1 удаа өөрчлөлт оруулж байсан бөгөөд Засгийн газрын бүтэц, бүрэлдэхүүн өөрчилж байгаатай уялдуулан уг тогтоолыг шинэчлэн найруулах нь зүйтэй гэж үзлээ. Ингэснээр тогтоолын бүтэц, уялдаа хангагдах юм.
Шинэчлэн боловсруулсан “Төрийн захиргааны байгууллагын тогтолцоо, бүтцийн ерөнхий бүдүүвч”-д Засгийн газрын тохируулагч агентлаг 10, Засгийн газрын хэрэгжүүлэгч агентлаг 18 ажиллахаар тусгасан бөгөөд Засгийн газрын тохируулагч агентлаг-Цөмийн энергийн газар, Засгийн газрын хэрэгжүүлэгч агентлаг-Тахарын ерөнхий газрыг тус тус татан буулгах нь зүйтэй гэж үзсэн болно.
Цөмийн энергийн газар нь цацраг идэвхт ашигт малтмал болон цөмийн энерги ашиглах, цөмийн технологи нэвтрүүлэх, цөмийн судалгааг хөгжүүлэх талаар төрөөс баримтлах бодлогыг хэрэгжүүлэх, цөмийн болон цацрагийн хамгаалалт, аюулгүй байдлыг хангах, мэргэжлийн хяналт тавих үндсэн чиг үүргийг хэрэгжүүлж ирсэн бөгөөд тус агентлагийн цацраг идэвхт ашигт малтмал эрэх, хайх, ашиглахтай холбогдох чиг үүргийг Ашигт малтмалын газар, цөмийн энерги ашиглах, цөмийн технологи нэвтрүүлэх, цөмийн судалгааг хөгжүүлэхтэй холбогдох асуудлыг Цөмийн энергийн комисс, цөмийн болон цацрагийн хамгаалалт, аюулгүй байдлыг хангах, мэргэжлийн хяналт тавих үндсэн чиг үүргийг мэргэжлийн хяналтын байгууллага тус тус хариуцан ажиллахаар холбогдох хуулийн төсөлд тусгалаа.
Шүүн таслах ажиллагааны хэвийн нөхцөлийг бүрдүүлэх, шүүх, шүүгчийн аюулгүй байдлыг хангах, гэрч, хохирогчийг хамгаалах, яллагдагч, ялтныг хуяглан хүргэх, яллагдагч, гэрчийг албадан ирүүлэх, ялтан шилжүүлэх, оргон зайлсан яллагдагч, ялтныг эрэн сурвалжлах зэрэг Тахарын албаны гүйцэтгэх чиг үүргийг Шүүхийн шийдвэр гүйцэтгэх ерөнхий газар, Цагдаагийн байгууллага тус тус хариуцан гүйцэтгэх бүрэн боломжтой тул тус албыг татан буулгахаар холбогдох хуулийн төслүүдийг боловсруулсан болно.
“Төрийн захиргааны байгууллагын тогтолцоо, бүтцийн ерөнхий бүдүүвч”-д Засгийн газрын бүтцийн тухай, Засгийн газрын бүрэлдэхүүний тухай, Засгийн газрын тухай хуульд өөрчлөлт оруулах тухай хуулийн төслүүдтэй уялдуулан сайд нарын эрхлэх асуудлын хүрээнд ажиллах Засгийн газрын агентлагуудыг тодорхойлсон. Тухайлбал, гадаадын шууд хөрөнгө оруулалтын хэмжээ сүүлийн 3 жил манай улсад тасралтгүй буурч байгаа хүнд үед хөрөнгө оруулагчдын итгэлийг сэргээж, хөрөнгө оруулалтын хэмжээг нэмэгдүүлэх, төр, хувийн хэвшлийн түншлэлийн үйл ажиллагааг идэвхжүүлж, төрийн болон орон нутгийн өмчийн үр ашгийг нэмэгдүүлэх, шинэчлэн сайжруулах, өөрчлөн байгуулах зэрэг асуудлыг Ерөнхий сайдын шууд удирдлагад хариуцуулан ажиллуулах нь зүйтэй гэж үзэн, холбогдох өөрчлөлтийг хуулийн төслүүдэд тусгасан болно.
Засгийн газрын бүтэц, бүрэлдэхүүн болон “Төрийн захиргааны байгууллагын тогтолцоо, бүтцийн ерөнхий бүдүүвч”-ийг шинэчлэн батлахтай холбогдуулан дараах хууль, Улсын Их Хурлын тогтоолын төслүүдийг боловсруулсан. Үүнд:
-Засгийн газрын бүрэлдэхүүний тухай;
-Засгийн газрын бүтцийн тухай;
-Монгол Улсын Засгийн газрын тухай хуульд өөрчлөлт оруулах тухай;
-Засгийн газрын бүрэлдэхүүний тухай хуулийг хүчингүй болсонд тооцох тухай;
-Засгийн газрын бүтцийн тухай хуулийг хүчингүй болсонд тооцох тухай;
-Хилийн боомтын тухай хуулийг хүчингүй болсонд тооцох тухай;
-Газрын тухай хуульд өөрчлөлт оруулах тухай;
-Монгол Улсын хилийн тухай хуульд нэмэлт, өөрчлөлт оруулах тухай;
-Концессын тухай хуульд өөрчлөлт оруулах тухай;
-Хөрөнгө оруулалтын тухай хуульд өөрчлөлт оруулах тухай;
-Тахарын албаны тухай хуулийг хүчингүй болсонд тооцох тухай;
-Гүйцэтгэх ажлын тухай хуульд өөрчлөлт оруулах тухай;
-Шүүхийн шийдвэр гүйцэтгэх тухай хуульд өөрчлөлт оруулах тухай;
-Монгол Улсын шүүхийн тухай хуульд өөрчлөлт оруулах тухай;
-Байгаль орчныг хамгаалах тухай хуульд өөрчлөлт оруулах тухай;
-Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн зарим заалтыг хүчингүй болсонд тооцох тухай;
-Иргэний хэрэг шүүхэд хянан шийдвэрлэх тухай хуульд өөрчлөлт оруулах тухай;
-Захиргааны хэрэг хянан шийдвэрлэх тухай хуульд өөрчлөлт оруулах тухай;
-Цөмийн энергийн тухай хуульд нэмэлт, өөрчлөлт оруулах тухай;
-Ашигт малтмалын тухай хуульд өөрчлөлт оруулах тухай;
-“Төрийн захиргааны байгууллагын тогтолцоо, бүтцийн ерөнхий бүдүүвчийг шинэчлэн батлах тухай” Улсын Их Хурлын тогтоолын төсөл;
-“Монгол Улсын төрөөс цацраг идэвхт ашигт малтмал болон цөмийн энергийн талаар баримтлах бодлого батлах тухай” Улсын Их Хурлын тогтоолын зарим заалтыг хүчингүй болсонд тооцох тухай” Улсын Их Хурлын тогтоолын төсөл/beta/upload/files/3.pdf
Tweet
