Улсын Их Хурлын 2015 оны намрын ээлжит чуулганы 2015 оны 12 дугаар сарын 10-ны өдрийн  /Пүрэв гараг/ хуралдааны гар тэмдэглэлээс хүргэж байна. 

Хөдөлмөрийн тухай /шинэчилсэн найруулга/ болон холбогдох бусад хуулийн төслүүд  /Засгийн газар 2015.06.15-ны өдөр өргөн мэдүүлсэн, анхны хэлэлцүүлэг/ үеэр Улсын Их Хурлын гишүүн С.Дэмбэрэл үг хэлж, байр сууриа илэрхийллээ.

Улсын Их Хурлын гишүүн С.Дэмбэрэл: -Энэ маш чухал хууль. Энд байгууллагуудаас ирсэн нилээн хэдэн санал байж байна. Энэхүү хуулийн анхны төсөл дээр нэмэгдээд ийм олон санал болсон байна. Тэгэхээр хуулийн анхан шатны боловсруулалт жаахан тааруу байсан юм уу даа гэж харагдлаа. Тэгээд цаашаа процедурын хувьд явахад хэцүү байгаа юм байна л даа. Үүнтэй холбогдуулан хэлэхэд, бид ямар үед ирээд байна вэ? –Өнөөдөр Монгол улсын эдийн засгийн өсөлтийг яаж хангах вэ гэдэг хамгийн чухал цаг үедээ байна. Дөнгөж сая бид газраар дамжиж, өсөлтийг хангах зүйлийнхээ хязгаарлалтыг их маргаантай байж байгаад баталчихлаа. Өөрөөр хэлбэл капиталаар дамжиж, эдийн засгийн өсөлтийг хангадаг тэр боломж байхгүй болсон. Одоо ерөөсөө хөдөлмөрөөр дамжиж, эдийн засгийн өсөлтийг хангах, ийм л зүйл гол нь үлдлээ. Өөрөөр хэлбэл, Монголын эдийн засгийн боломж нь ийм байна. Тэгэхээр энэ хууль маань их чухал хууль болохоор үүнийг батлах гэж байгаа цаг үе нь бас эвгүй цаг үед батлах гэж байна. Улс төрийн намуудын ард түмнийг хайрлах хайрын сэтгэл нь хүчтэй ялгарч байгаа энэ үед бид нар үүнийг хэлэлцэж,  батлахад баланс алдагдуулах буюу хөдөлмөрийн зах зээлийн оролцогчдын нэг талыг нь хэт хайрлах асуудал гарч болно. Өөрөөр хэлбэл,хууль маань ажилчин хүнийг хайрлах ийм хайрын хэт их илэрхийлэлтэй болчих вий гэсэн болгоомжлол байгаад байгаа. Гэхдээ хууль дээр энэ балансыг алдагдуулахгүй байх талаас нь маш их анхаарсан. Иймээс Монгол улсын нийгэмд тулгамдаж байгаа нэг асуудал болох 24 хүртэлх насны залуусын ажлын байрыг Засгийн газар хагас цэргийн  байдалтай зүйлийг санал болгоод байгаа. Үүний хууль эрх зүйн үндсийг яаж оруулах юм бэ гэдэг асуудал бас байгаа юм. Ер нь залуучуудын хөдөлмөр эрхлэлтийг дэмжих хууль эрх зүйн үндсийг яаж оруулах юм вэ гэдэг асуудал их чухал. Үүнтэй холбогдуулан санал ирүүлсэн компаниуд ч бас бий. Тухайлбал, Оюу толгой, Мобиком компаниуд, Эдийн засгийн зөвлөл гэх мэт том, жижиг бүх төрлийн компаниас тус тус санал ирүүлсэн байгаа. Эмэгтэйчүүдийн бизнес эрхлэгчдийн  байгууллагаас надад хаяглан бас ирүүлсэн байна. Үүний ихэнхи саналыг нь авч байгаа. Тэгээд УИХ дээр цаашаа хэлэлцэхээр маш их цаг зарцуулна. Тэр тусмаа, УИХ-ын чуулганы өнөөдрийн хуралдаан шиг ирц муу байгаа үед Ажлын хэсэг ч хуралдаж чадахгүй байна. Мөн бусад байнгын хороо дээр ч адилхан байгаад байна. Тийм учраас үүнийг ерөнхийдөө татаж аваад энэ бүх саналуудыг нэгтгээд, оруулж ирсэн нь зүйтэй болов уу гэсэн ийм л санал хэлэх гэсэн юм. За, баярлалаа. 

Улсын Их Хурлын гишүүн С.Дэмбэрэлийн ажлын алба