Улсын Их Хурлын 2015 оны хаврын ээлжит чуулганы 2015 оны 10 дугаар сарын 01-ны өдрийн Төрийн байгуулалтын байнгын хорооны /Пүрэв гараг/ хуралдааны гар тэмдэглэлээс хүргэж байна.

- Засгийн газрын гишүүнийг огцруулах тухай асуудал;

-Монгол Улсын Их Хурлын тухай хуулийн 7 дугаар зүйлийн 7.1.12 дахь заалт Үндсэн хуулийн холбогдох заалтыг зөрчсөн эсэх маргааныг хянан шийдвэрлэсэн тухай Үндсэн хуулийн цэцийн 2015 оны 11 дүгээр дүгнэлтийг хэлэлцэх үеэр Улсын Их Хурлын гишүүн С.Дэмбэрэл үг хэлж, байр сууриа илэрхийллээ.

Улсын Их Хурлын гишүүн С.Дэмбэрэл: -Үндсэн хуулийн цэцийн санал дүгнэлтийн асуудлаар хэдэн үг хэлье. Өнөөдөр хэлэлцэж байгаа энэ хоёр асуудал хоорондоо холбоотой юм шиг яриад байна, холбоотой байх ёсгүй.

Монгол улсын хувьд эдийн засаг, улс төр, нийгмийн амьдрал  нь тааруу байгаа энэ цагт хүн бүр, институц бүр нь хийх ажлаа сайн хийгээд л явах ёстой. Тэрнээс биш, хүн огцруулдаг цаг ч биш, энэ тухай боддог цаг үе нь биш байна. Гэхдээ энэ бол хүний ЭРХ.

Энэ асуудал дээр манай намын байр суурь гэхээсээ илүүтэй С.Дэмбэрэл гэдэг хувь хүн, гишүүний байр суурь бол Эдийн засаг, ард түмний аж амьдрал тааруу муу, улс төр өөрөө тогтворгүй ийм байгаа нөхцөлд аливаа Улс төрийг тогтворжуулах сөрөг нөлөөтэй энэ зүйлсийн талаар болгоомжтой ярих нь зүйтэй. Тийм учраас энэ асуудал дээр хэрвээ асуудал яригдаад эхлэх юм бол би огцруулахгүй гэдэг дээр саналаа өгнө. Яагаад би эхний асуудлыг яриад байна бэ гэхээр хоёрдугаар асуудалтай бас холбогдчихлоо.

Хоёрдугаар асуудлын хувьд ганц л зүйлийг лавламаар байна. Үндсэн хуулийн 25.1.6-ийг Та бүхэнд уншаад өгөөсэй! 25.1.6-д УИХ-ын онцгой бүрэн эрх гэж бий, энд юу гэж бичсэнийг хараасай. Тэгээд ямар дүгнэлт гаргах нь их ойлгомжтой болно. Үндсэн хуулийн цэцийн дүгнэлттэй холбоотой лавлагаа дээр хянан шийдвэрлэсэн тухай албан бичигээс энэ заалтыг олохгүй байна.

Уг нь энэ заалтаас эхлэж явах ёстой. Энэ заалтыг гишүүдэд тарааж бас өгөөсэй. Эндээс УИХ-ын гишүүдийн тодорхой санал гарч, энэ асуудал хамгийн зохистойгоор шийдэгдэх байх гэж бодож байна. За, баярлалаа.

Улсын Их Хурлын гишүүн С.Дэмбэрэлийн ажлын алба