Монгол Улсын Их Хурлын 2015 оны хаврын ээлжит чуулганы 05 дугаар сарын 07-ны өдрийн /Пүрэвгараг/-ийн хуралдааны гар тэмдэглэлээс хүргэж байна.

Нийслэл хотын албан татварын тухай хуулийн төсөл /Засгийн газар 2014.12.30-ны өдөр өргөн мэдүүлсэн, анхны хэлэлцүүлэг/-ийг хэлэлцэх үеэр

Улсын Их Хурлын гишүүн С.Дэмбэрэл: Хэд хоногийн өмнө Монгол Улсын Ерөнхий сайд Улсын Их Хурлын индэр дээрээс татварын реформын талаар үг хэлсэн. Нийт бизнес эрхлэгчид түүний дотор ихэнхи жижиг дунд бизнес эрхлэгчид ямар ч байсан бидний татварын орчныг сайжруулах юм байна. Татварын реформ хийгдэх юм байна гэсэн хүлээлттэй хоцорсон. Ингээд хэдхэн хоног болоод Монгол Улсын Ерөнхий сайдын хэлсэн үгний үзэл санаатай таарахгүй зүйлийг хэлэхдээ “2014 оны 12 дугаар сарын 31-нд байсан юм, одоо бол 5 сар явж байна. Долоо хоногийн өмнө л хэлсэн юм” гээд цаг хугацааны хувьд тайлбар өгөөд орж ирж байгаад үнэхээр гайхаж байна. Би нэг л зүйлийг асуумаар байна. Татварын реформыг яг эдийн засгийн хүнд хэцүү үед /буруу үед нь реформ гэсэн үзэл санааг гутаан/  буруу хуулийг, буруу байдлаар оруулж ирээд байх юм. Тийм учраас санаачлагч Засгийн газар нь татаж аваад, сайн хянаж үзээд энэ цаг үе нь мөн үү биш үү, оногдуулах объект нь зөв үү, буруу юу гэдэг талаас нь сайн бодохгүй бол болохгүй байна. Улсын Их Хурал дээр байгаа ажлын хэсэг бий. Одоо татварын ерөнхий харилцаанаас гадна татварын гол гол төрөлүүдээ аль болох буцааж олгох, хөнгөлөлт чөлөөлт гэсэн татварын реформын ерөнхий уур амьсгал явж байгаа ш дээ. Тэгэхэээр энэ одоо юу гэсэн үг юм бэ, ямар үзэл санаатай байгаа юм бэ? Улаанбаатар хотын хувьд бол би ойлгодог. Би өөрөө хотын иргэн. Гэхдээ энэ цаг үе чинь биш байна.  Тийм учраас би Засгийн газраас, С.Баярцогт сайдаас Монгол Улсын Ерөнхий сайд Ч.Сайханбилэгийн хэлсэн үгэний эсрэг зүйл оруулж иржээ. Үүнийгээ татаж авах хэрэгтэй гэдгийг хэлмээр байна. Ер нь Төсвийн байнгын хороогоороо хэлэлцэх байсан юм биш үү? УИХ-ын гишүүдэд хандаж хэлэхэд иргэдэд бас ачаалал болно шүү. Тийм учраас яг бодит ачааллын тооцоог нарийвчлан сангийн яам, ажлын хэсэг, нийслэл хот юм уу гэдгийг яг одоо бидэнд хэлж өгнө үү. Тоогоор биш гэхэд тооцоолсон аргачлал байх ёстой, тэр хэд гэж гарсан юм бэ?  Реформын үзэл санаа таарч байна уу, үгүй юу? Та бүхэнээс үүн дээр товчхон хариултууд авмаар байна. Би ерөнхийдөө хариултыг тааварлаж байна. Гэхдээ л үгийг чинь өөр хүмүүс сонсох хэрэгтэй байх.

Улсын Их Хурлын гишүүн Б.Болор: С.Дэмбэрэл гишүүний асуултанд хариулъя. Хариултыг гадарлаж байна гэж хэллээ. Ер нь бол түрүүнээс хойш нилээн ярьсан. Хуулийн төсөл өргөн баригдаад нилээн удсан. Төсвйин байнгын хороо дээр гарч ажилласан ажлын хэсэг энэ хуулийг нэгэнт Улсын Их хурлаар нэгэнт хэлэлцэх эсэхээ шийдсэн байгаа энэ үед аль болох сайжруулах тал дээр ажиллаж байгаа.

Харин буцаах эсэх тал дээр санал хураалт явагдаад Улсын Их Хурал дээр олонхи нь үүнийг хэлэлцэх нь зүйтэй гэж шийдээд явж байгаа учраас тэр зарчмынхаа дагуу явж байна. Мэдээж хэрэг хууль санаачлагч энэ хуулиа хэзээ ч татаж авсан болно. Үүнийг өнгөрсөн тав дахь өдөр Монгол улсын ерөнхий сайд Улсын Их Хурлын индэр дээрээс хэлсэн үгэндээ татвар нэмэхгүй гэж хэлсний дагуу Засгийн газар өөрөө энэ хуулиа татаад авахад болохгүй зүйл байхгүй. Улсын Их Хурлын төсвийн байнгын хорооны хувьд дэг, журамынхаа дагуу хэлэлцэнэ гээд Улсын Их Хуралаар олонхи нь шийдсэн байгаа энэ хуулийг хэлэлцээд явж байна. Байнгын хороо дээр Улсын Их Хурлын гишүүн орж ирж, саналаа хэлэх, саналаа гаргах, саналаа хураалгах бүрэн эрхтэй. Үүний дагуу байнгын хорооны хурал явагдаад, Улсын Их Хурлын чуулганаар анхны хэлэлцүүлэг нь явагдаж байна.

УИХ-ын гишүүн С.Дэмбэрэлийн ажлын алба