дийн засгийн байнгын хорооны өнөөдрийн хуралдаанаар “Төрөөс мөнгөний бодлогын талаар 2014 онд баримтлах үндсэн чиглэл батлах тухай” УИХ-ын тогтоолын төслийг хэлэлцсэн юм. Харин байнгын хорооны гишүүний бүрэлдэхүүнд багтдаг МАН-ын бүлгийнхэн “Валютын ханш өссөн, төгрөгийн тогтвортой байдлыг хангаагүй, үнэ тогтворжуулах хөтөлбөр нэрийдлээр гурван их наяд төгрөгийг цацсан. Найман хувийн орон сууцны зээлээс болж байрны үнэ 50 хувь нэмэгдсэн” хэмээн нэлээд шүүмжлэлтэй хандсан юм. 

Гэвч Монголбанкны ерөнхийлөгч Н.Золжаргал энэ бүхэнд дорвитой хариулт өгөхгүй, бөөрөнхийлж суусан гэхэд болно. Түүний хувьд “Төгрөгийн ханш суларсан нь гадны хөрөнгө оруулалт буурч, орж ирэх валютын хэмжээ багассантай шууд холбоотой. Үнэн тогтворжуулахад биш эдийн засгийг тогтворжуулах хөтөлбөрт гурван их наяд төгрөг зарцуулсан. Үнэ тогтворжуулах хөтөлбөрийн мөнгийг Засгийн газар тараагаагүй, арилжааны банкуудаар дамжуулж, бизнес эрхлэгчдэд олгосон. Харин “Чингис бонд”-ын үлдэгдэл 650 сая ам.долларын хүүг Монголбанк хариуцаж байгаа” гэсэн тайлбарыг өгч байсан юм. Харин “Төрөөс мөнгөний бодлогын талаар 2014 онд баримтлах үндсэн чиглэл батлах тухай” УИХ-ын тогтоолын төсөлтэй холбогдуулж АН-ынхан болон эвслийг бүрдүүлэгч намын гишүүд эерэг санал хэлсэн юм. Тухайлбал:

УИХ-ын гишүүн Г.Батхүү: -Монголбанкны бодлого тодорхой үр дүнд хүрч байна. Эцсийн үр дүнг харалгүйгээр бодлогыг өөрчлөх, эсвэл 100 хувь эсэргүүцэх тухай ярьж болохгүй. Урьд нь УИХ-ын гишүүд зээл хүссэн иргэдийн хүсэлд дарагддаг байсан. Сүүлийн жилд иймэрхүү хүсэлт эрс багассан. Жижиг, дунд үйлдвэрлэлийг дэмжих зээл иргэдэд хүрч байна.

УИХ-ын гишүүн Ц.Баярсайхан: -Ипотекийн зээл гэдэг халамжийн бодлого бус, хариуцлагын тогтолцоо юм. Урьд нь зээл авсан иргэд сар бүрийн төлбөрөөсөө 150-600 мянган төгрөгөөр чөлөөлөгдөж байгаа. Энэ мөнгөө өөр зүйлд зарцуулах боломжтой болсон. Монголбанкны хэрэгжүүлж эхэлсэн зөв бодлогыг энэ удаа дахин дэмжиж, үргэлжлүүлэх нь зүйтэй.

УИХ-ын гишүүн С.Дэмбэрэл: -Төрөөс баримтлах мөнгөний бодлогод зөвхөн инфляци бус ажил эрхлэлтийг онилсон бодлого тусгасан нь сайн. Харин Санхүүгийн зохицуулах хороо ажлаа хийхгүй, Монголбанкинд бүх ачааг үүрүүлж байна.

УИХ-ын гишүүн М.Сономпил: -Арилжааны банкны зээл жилийн 14-15, Монголбанкны зээл 4-5 хувь байдаг. Зээлийн хүүгийн 10 хувийн зөрүүнээс бизнес эрхлэгчид хожиж байгаа. Энэ бол дэмжлэг.
УИХ-ын гишүүн Д.Ганхуяг: -Үндсэн хуульд Монгол Улсын эдийн засгийг “Төрийн зохицуулалттай зах зээлийн эдийн засаг” гэж заасан байдаг. Үүний дагуу эдгээр зохицуулалт хийгдэж байгаа.

УИХ-ын гишүүн Б.Гарамгайбаатар: -Төрөөс баримтах мөнгөний бодлого сайжирч байгаа. Маргаантай асуудлуудаар нэгдсэн ойлголтод хүрэхийн тулд Монголбанкинд шалгалт оруулсан гэсэн юм. Ингээд тогтоолын төслийг хэлэлцэхийг олонхийн саналаар дэмжиж, УИХ-ын нэгдсэн чуулганд танилцуулахаар шилжүүлэв.