Улсын Их Хурлын 2015 оны намрын ээлжит чуулганы 2015 оны 01 дүгээр сарын 09-ны өдрийн хуралдааны тэмдэглэлээс хүргэж байна.

Монгол Улсын нэгдсэн төсвийн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд өөрчлөлт оруулах тухай, Төсвийн тогтвортой байдлын тухай хуульд нэмэлт, өөрчлөлт оруулах тухай, Төсвийн тухай хуульд нэмэлт оруулах тухай хуулийн төслүүдийг хэлэлцэх үеэр

 Хэлэлцэж буй асуудалтай холбогдуулан, УИХ-ын гишүүн С.Дэмбэрэл үг хэлж, байр сууриа илэрхийллээ.

Улсын Их хурлын дарга З.Энхболд: Дэмбэрэл гишүүн дэмжихгүй бол үг хэлнэ шүү. Дэмбэрэл гишүүн.

 УИХ-ын гишүүн С.Дэмбэрэл:  -Баярлалаа. Нэгдүгээрт: -За, нэгэнт дэмжихгүй гэж үг хэлсэн болохоор хамгийн түрүүнд дэмжихгүй байгаа зүйлээ хэлье. Монгол Улсын төсвийг иймэрхүү байдлаар хэлэлцэхийг дэмжихгүй байна.  Өөрөөр хэлбэл харилцан бие биенийгээ популист, популизм гэсэн энэ хандлага. Тэгэхээр одоо юм болгоныг эдийн засаг, эдийн засаг, эдийн засаг гэдэг шиг гурваар хэлдэг моодтой болчихсон болохоор популизм, популизм, популизм гээд Улсын Их Хуралд хамгийн их таарч байгаа  зүйл шүү гэдгийг хэлмээр байна. 

-Хоёрдугаарт, энэ төсвийн хүрээний мэдэгдэл дээр тухайлбал, энэ үзүүлэлтүүдийг үндэслэлгүй гэж яриад байх юм.  Ингэж ярихыг дэмжихгүй байна. Яагаад гэвэл үндэслэлүүд нь төсвийн цэнхэр номны ард нь байна. Тэр үндэслэлүүдээ л унших хэрэгтэй, тийм учраас ийм байдлаар хэлэлцэхийг дэмжихгүй гэж байгаа юм. Тухайлбал, хэрэглээний үнийн индекс бүх зүйл дээр байгаа шүү дээ. Монголбанкны  2015 оны мөнгөний бодлого дээр бид бүгдээрээ яриад л баталчихсан зүйлүүд шүү дээ. Харин үүн дээр  ДНБ-нд эзлэх улсын өрийн нийт хэмжээ гэдэг дээр бид нар ганцхан өр ба ДНБ гэж бүх хүн ярьж байгааг дэмжихгүй байна. Яагаад гэвэл олон улсын хэмжээнд ингэж ярьдаггүй. Зөвхөн өр ба ДНБ биш, үүнийг Сангийн яамныхан анхаарах хэрэгтэй шү, УИХ-ын гишүүдэд бусад хуралдаануудыг гаргаж өгөх хэрэгтэй, уул нь бас л цэнхэр номон дотор байгааг олоод уншчих хэрэгтэй л дээ...

Хуримтлагдсан нийт өр, экспорт, валютын нөөц энэ бүх хэдэн харьцаануудыг гаргаад Улсын Их Хурлын гишүүдэд өгөөд ингээд цаашаа явбал энэ асуудал чинь хурдан явна.  Үүний үндэслэл  40, 70 гээд тодорхой үндэслэлүүд нь хангалттай ардаа гарчихсан байна. Тийм учраас ийм байдлаар ингээд яваад байвал бид нар энэ төсөв дээр нэлээн удах юм шиг байна.

Түүний дараа Засгийн газраас Өрийн удирдлагын тухай хуулийг  өнгөрсөн хавар оруулж ирээд байхад одоо хүртэл аль байнгын хороо, ажлын хэсэг дээр хаана яваа нь мэдэгдэхгүй ийм байгаа байдлыг дэмжихгүй байна. Би дэмжихгүй л юмнуудаа яриад байна шүү дээ. 

Хяналтын тухай хуулийг цоо шинэ концепцоор оруулж ирээд нэлээн удаж байхад төслийн номын хоёрдугаар хавсралтад байгаа “жилдээ хэдэн ширхэг  хяналт хийнэ” гэсэн тийм зүйлүүд нь яваад байгаа нь бид хуулийг нь удаагаад баталж өгөхгүй байгаа учраас ингээд яваад байгааг дэмжихгүй байна. Дэмжихгүй зүйлүүд маань дандаа бидэнтэй, УИХ-ын үйл ажиллагаатай холбоотой байгааг дэмжихгүй байна.

Энэ оруулж ирж байгаа нэгдүгээр хавсралтад байгаа чанарын болон тооны үзүүлэлтүүдийг ийм байдлаар батлуулахыг дэмжихгүй ээ. Хоёрдугаар хавсралтад байгаа хөрөнгө оруулалтын ард байгаа тоонуудыг урьдын адил тойргийн сонирхол, лобби давамгайлсан байдлаар хэлэлцэж буйг дэмжихгүй.

УИХ-ын гишүүн С.Дэмбэрэлийн ажлын алба