Улсын Их Хурлын чуулганы 2015оны 01 дугаар сарын 09-ны өдрийн нэгдсэн хуралдааны тэмдэглэлээс хүргэж байна.

УИХ-ын чуулганы үдээс өмнөх нэгдсэн хуралдаанаар Монгол Улсын 2015 оны төсвийн тухай хуульд нэмэлт, өөрчлөлт оруулах тухай хуулийн төслийн хамт өргөн мэдүүлсэн Төрийн албаны тухай хуульд өөрчлөлт оруулах тухай, Монгол Улсын Засгийн газрын тухай хуульд өөрчлөлт оруулах тухай, Монгол Улсын яамны эрх зүйн байдлын тухай хуульд өөрчлөлт оруулах тухай, Монгол Улсын засаг захиргаа, нутаг дэвсгэрийн нэгж түүний удирдлагын тухай хуульд өөрчлөлт оруулах тухай, Цагдаагийн албаны тухай хуульд өөрчлөлт оруулах тухай, Тахарын албаны тухай хуульд өөрчлөлт оруулах тухай, Статистикийн тухай хуульд өөрчлөлт оруулах тухай зэрэг хууль тогтоомжийн төслүүдийн хэлэлцэх эсэх асуудлыг хэлэлцсэн юм. Энэ талаарх хууль санаачлагчийн илтгэлийг Засгийн газрын гишүүн, Сангийн сайд Ж.Эрдэнэбат, Төсвийн байнгын хорооны санал, дүгнэлтийг УИХ-ын гишүүн Д.Ганхуяг нар танилцууллаа.

Төсвийг хэмнэлтийн горимд шилжүүлэх чиглэлээр УИХ, Засгийн газраас тавьсан зорилтын хүрээнд төсвөөс санхүүжүүлж байгаа нийгмийн хамгааллын шинжтэй зарим арга хэмжээг зорилтот бүлэгт чиглүүлэх, татаас урамшууллыг зорилт, үр дүнтэй нь уялдуулж авч үзэх, төсвийн байгууллагуудын чиг үүргийн давхардлыг арилгаж бүтэц, зохион байгуулалтыг оновчтой болгох, зарим хөтөлбөр, арга хэмжээг шинээр хэрэгжүүлэхгүй байх, урсгал зардлыг нь тодорхой хэмжээгээр бууруулах зэргээр зардлын өсөлтийг хязгаарлах, үр ашгийг сайжруулах чиглэл баримталж урсгал зардлын 2015 оны тодотголын төслийг боловсруулсантай холбогдуулан дээрх 25 хууль, УИХ-ын нэг тогтоолд нэмэлт, өөрчлөлт оруулах тухай хууль тогтоомжийн төслүүдийг боловсруулжээ.

Сангийн сайд илтгэлдээ, УИХ-ын 2012 оны 14 дүгээр тогтоолоор батлагдсан “Төрийн захиргааны байгууллагын тогтолцоо, бүтцийн ерөнхий бүдүүвч”-ийн дагуу 16 яам, 30 агентлагтай байсан бол УИХ-ын 2014 оны 75 дугаар тогтоолоор 15 яам, 29 агентлагтайгаар үйл ажиллагаа явуулахаар бүтэц, чиг үүргийг өөрчлөн баталсан. Дээрх өөрчлөлтийн дагуу Засгийн газрын 2014 оны 12 дугаар сарын 15-ны өдрийн хурлаар яам, агентлагуудын бүтэц, орон тооны дээд хязгаарыг шинэчлэн тогтоосноор, 2014 оны батлагдсан төсөвтэй харьцуулахад үндсэн ажиллагсдын нийт орон тоог дунджаар 15 хувиар бууруулахаар шийдвэрлэсэн тул холбогдох өөрчлөлтийг төсвийн төсөлд тусгасан.

 Хэлэлцэж буй асуудалтай холбогдуулан УИХ-ын гишүүн С.Дэмбэрэл үг хэлж, байр сууриа илэрхийллээ.

УИХ-ын гишүүн С.Дэмбэрэл: -2015 оны төсвийн тодотголыг үндсэнд нь дэмжиж байгаа. Цаашид хамгийн гол нь тодотголын хүрээнд хийх ажлын гаргалгаа чухал байна, хоёр нам эдийн засгийн хүндрэлээс гарах хөтөлбөр хийе гэсэн юм байна, түүн дээр улс төрийн бүх намуудыг оруулаад, яаралтай гаргах хэрэгтэй байна. Энэ цэнхэр номд нилээн олон санаанууд байна, түүнийг задалж, өмнөх УИХ-ын тогтоолын задарсан төлөвлөгөө,  төсвийн тодотголоор орж ирж байгаа бүх санал, дүгнэлтийг нийлүүлж, улс төрийн бүх намууд оролцоод, яаж Эдийн засгийн хүндрэлээс ямар арга хэрэгсэлээр, мөнгөний бодлого болон төсвийн бодлогыг яаж уялдуулж, макро эдийн засгийн нөөцийг яаж уялдуулах юм бэ, гадаад валютын нөөц, дотогшлох урсгал, хөрөнгө оруулалтын урсгал, Монгол улсын өрийг яаж удирдахын энэ бүх асуудлууд энгийн дэглэмээр яваад байгаа...

Бид нар энд бухимдаад, тал талаас нь ярьсаар байдаг. Гэтэл Өрийн удирдлагын тухай хууль 2014 оны хавар орж ирсэн, үнэхээр хүн бүхэн санаа зовж байгаа бол, яагаад үүнийг хэлэлцэхгүй байгаа юм бэ, аль байнгын хороо дээр явж байгаа, хэзээ хэлэлцэх юм бэ гээд УИХ дээр зөндөө асуудлууд байна. У.Хүрэлсүх сайд “Хяналтын тухай хууль” гэж ярьсан, Засгийн газар оруулж ирсэнээс хойш хичнээн удлаа, одоо болтол хэлэлцэгдээгүй. Бид өөрсдөө тайван, залхуу байдалтай явдаг, Засгийн газрын өргөн мэдүүлсэн хуулийн төслүүд орж ирэхээр тал талаас нь яаруулах ийм л “парадокс зүйл” УИХ-ын үйл ажиллагаанд ажиглагдаад байгаа. Үүнийг УИХ-ын дарга, даргын зөвлөлөөр анхааралдаа авч, ажлаа үр дүнтэй болгох, хурдан шуурхай болгох асуудлыг ярьдаг болмоор байна.

Түрүүн миний дурдсан нэгдүгээр хавсралт дээр Засгийн газар анхаарах хэрэгтэй, түүнээс харахад “Эдийн засгийн шог нийтлэл” бичмээр, хүмүүс уншмаар тийм зүйлүүд байсан. Хоёрдугаар хавсралт дээр “зөв зохистой таналт” тэгсэн мөртлөө эдийн засаг нь борцлогдохгүй байдлаар....

Энэ бодлогын хувьд Засгийн газрын санал нь тодорхой байгаа, гэтэл тойрог голдуу асуудал яриад байна. Үлдэж байгаа хэлэлцүүлэгтээ энэ талаас нь бодмоор байна. Тийм учраас Улс төрийн намуудын жагсаалтын болон, тойргийн гишүүний тэнцүү тооны төлөөлөлтэй төсвийн тодотголыг бодитойгоор хэлэлцэх ажлын хэсгийг УИХ-ын даргын захирамжаар байгуулагдаасай.

Би түрүүн Сангийн сайд Ж.Эрдэнэбатаас “Төсвийн байнгын хорооны ажлын хэсэг гараад, байнгын хорооны хэдэн санал авсан болоод байх юм биш биз” гэж асуусан, тийм зүйл байхгүй гэсэн. Гэхдээ тийм бүтэцтэй төсөв орж ирээд байна, мэдээж сургууль, эмнэлэг, цэцэрлэг, соёлын обьектууд хэрэгтэй. Гэхдээ хаана ямар үед хэрэгтэй гэдгийг, зохистой ярилцах хэрэгтэй.  Уг нь зөвшилцөл хэрэгтэй, зөвшилцөлөө л гэдэг, орж ирээд л өөр зүйл ярих юм.  Эдийн засгийн өсөлтийн хувьд хэдэн хувиар яаж тооцсон юм бэ, эхний хуудас дээр тодорхой биш байна. Тийм учраас зарим гишүүд хооронд нь уялдуулж өгөөчээ гэж хэллээ. Цаашид суурьтай суух гишүүд хэрэгтэй, мөн үүнийг тайлбалаж өгөх хэрэгтэй байна.

УИХ-ын гишүүн С.Дэмбэрэлийн ажлын алба