2014 оны 12 дугаар сарын 23-ны өдрийн УИХ-ын Эдийн засгийн байнгын хорооны хуралдааны дэлгэрэнгүй тэмдэглэлээс хүргэж байна.

Энэ өдрийн хуралдаанаар хэлэлцсэн асуудлын нэг нь Байнгын хорооны даргыг сонгох тухай асуудлыг хэлэлцлээ. Тус байнгын хорооны даргад УИХ-ын гишүүн Ж.Батсуурийг нэр дэвшүүлж байгааг УИХ дахь МАН-ын бүлгийн дарга С.Бямбацогт Байнгын хорооны гишүүдэд танилцуулсан.

УИХ-ын гишүүн С.Дэмбэрэл: Нэр дэвшүүлсэн УИХ дахь МАН-аас асууъя.

Нэгдүгээрт: -Сүүлийн үед МАН хүмүүсээ нэр дэвшүүлэхдээ их сайхан  шудрага өрсөлдүүлэх процессоор явуулж байгааг харсан. Энэ удаа ч бас тийм байх гэж бодож байна. Ямар кондитатууд нэр дэвшсэн бэ, ямар шалгуураар Байнгын хорооны даргад  нэр дэвшигчийг сонгосон бэ?

Нэр дэвшигч УИХ-ын гишүүн Ж.Батсуураас тодруулъя.

Хоёрдугаарт: -УИХ дахь Эдийн засгийн байнгын хорооны даргаар сонгогдвол нэн түрүүнд ямар ажлыг хийхээр төлөвлөж байна бэ? Таны одоогийн Монгол Улсын эдийн засгийн гол дүгнэлтүүд юу вэ?

Гуравдугаарт: -Таны докторын зэрэг хамгааалсан сэдвийг сонирхож болох уу?

УИХ дахь МАН-ын бүлгийн дарга С.Бямбацогт: -МАН-ын бүлэг хуралдаад, боловсон хүчнийг шилж сонгох, томилох, журамынхаа дагуу нээлттэй ил тод байлгах зарчим барьж асуудалд хандсан. Удаа дараагийн томилогооноос харагдаж байгаа байх. Энэ удаа УИХ-ын гишүүнээр өмнө нь 1 удаа сонгогдон ажиллаж байсан, 2012-2014 онд УИХ-ын гишүүнээр  ажиллаж байгаа, УИХ-ын эдийн засгийн байнгын хороо, Нийгмийн бодлого, боловсрол соёл шинжлэх ухааны байнгын хороонд тус тус зургаа дахь жилдээ ажиллаж байгаа, үндсэндээ хууль тогтоох байгууллагад ажилсан туршлагатай, эдийн засгийн салбарт орон нутгийн засаг дарга хийж байсан гэж үзвэл мэдлэг, боловсрол, туршлага бүх талаараа бололцоотой Ж.Батсуурь гишүүний ажлын туршлагыг харгалзан нэр дэвшүүлсэн. Өрсөлдөөний зарчим бүлгийн хурал дээр нээлттэй байдаг. УИХ-ын МАН-ын бүлэг дээр Ж.Батсуурь гишүүнийг эдийн засгийн байнгын хорооны даргаар нэр дэвшүүлж, бүх гишүүд хүндэтгэлтэйгээр хийж чадна гэдэгт итгэлтэй хандаж, хүлээн зөвшөөрч, дэмжихээр оруулсан.  

УИХ-ын гишүүн Ж.Батсуур: -С.Дэмбэрэл гишүүний асуултанд хариулъя.

 Монгол орны эдийн засгийн нөхцөл байдал хүнд байгаа, эдийн засгийн хямрал руу шилжиж болзошгүй байгаа асуудлын талаар шинээр байгуулагдсан хамтарсан Засгийн газрын тэргүүн өнгөрсөн тав дахь өдрийн УИХ-ын чуулган дээр тодорхой мэдээлэл хийсэн. Өнөөдөр Монгол Улсын эдийн засагт болж байгаа үйл явдал, нөхцөл байдалд Засгийн газрын тэргүүний мэдээлсэн мэдээлэл, холбогдох асуудлуудтай миний хувьд санал дүгнэлт нэг байгаа. Ер нь цаашид хүндрэх аюул ч бий. Гэхдээ бид  бодлого, гарах арга замаа зөв тодорхойлсоноор аврах, шийдвэртэй арга хэмжээ авах, хэрэгжүүлэх боломжууд байна гэж дүгнэж байна.

УИХ-аас 134-р тогтоолыг гаргаж хэрэгжүүлэх ажлыг зохион байгуулах ажилд ороод байна. Энэ тогтоолын хэрэгжилтийг хангаж ажиллах тал дээр УИХ дахь Эдийн засгийн байнгын хорооноос ямар дэмжлэг туслалцаа үзүүлэх асуудал дээр, түүнчлэн валютын нөөц, түүний ханш, эрдэс баялгийн салбарын өрсөлдөх боломжийг дээшлүүлэх зэрэг асуудалд анхаарлаа хандуулан ажиллана. Мөн Засгийн газрын тэргүүний тодорхойлж байгаа хэмнэлтийн горимд шилжих асуудлыг дэмжих шаардлагатай байна. Түүнээс гадна Монгол улсын эдийн засгийн гол салбар болох Эрдэс баялгийн салбарын өрсөлдөх чадварыг сайжруулах тал дээр эдийн засгийн байнгын хорооноос ямар арга хэмжээ авч хэрэгжүүлэх шаардалагатай байна гэдэгт дүгнэлт хийж, туслалцаа үзүүлэнэ. Эдийн засгийн байнгын хороо бол дэд бүтцийн олон салбарыг нэгтгэсэн, уялдаа холбоог хангаж ажиллах шаардлагатай гол байнгын хороо, тиймээс байнгын хорооны гишүүд та нөхдийн дэвшүүлж байгаа, зорилт үзэл бодол дээр тулгуурлаж дэмжин ажиллах болно.

Би барилгын инженер, эдийн засагч, зохион байгуулалт мэргэжлээр техникийн их сургуулийг европт төгссөн, шинжлэх ухааны салбарт, Политехникийн дээд сургууль, Монгол Улсын Их сургууль, Шинжлэх Ухаан Технологийн Их сургуульд багш, салбар сургуулийн захиралын ажлыг тус тус хашиж байсан. Энэ үеэр Парагийн Их сургуульд “Зах зээлийн үеийн барилга үйлдвэрлэлийн эдийн засгийн өрсөлдөх чадвар түүний эрсдэл” сэдвээр докторын зэрэг хамгаалсан.

УИХ-ын гишүүн С.Дэмбэрэлийн ажлын алба