УИХ-ын чуулганы 2014 оны 12 дугаар сарын 09-ны өдрийн нэгдсэн хуралдааны дэлгэрэнгүй тэмдэглэлээс Эрхэм уншигч танд хүргэж байна.

Засгийн газрын гишүүн, Монгол Улсын сайд, ЗГХЭГ-ын даргын албан тушаалд С.Баярцогтыг томилох асуудлыг хэлэлцэх үеэр УИХ-ын гишүүн С.Дэмбэрэл үг хэлж байр сууриа илэрхийллээ.

УИХ-ын гишүүн С.Дэмбэрэл: -Юуны өмнө УИХ-ын гишүүн С.Баярцогт болон сайдад нэр дэвшиж байгаа бүх хүмүүст баяр хүргэе. Ажлын өндөр амжилт хүсье. Та бүхнийг бүгдийг нь дэмжих болно. Би Оюутолгойн талаарх эксперт биш. Ер нь УИХ-ын гишүүн С.Баярцогтын хариулж байгаа байдлаас болоод хэдэн зүйл хэлэхгүй бол болохгүй нь.

Нэгдүгээрт: -Дэлхий даяар мэддэг энгийн үнэн байгаа. Сайн гэрээ гэдэг бол аль аль талдаа ашигтай байгаа гэрээг хэлнэ. Гэрээ гэдэг бол өөрөө үйл явц. Тэр үйл явцыг үр дүнгээр нь баримт бичиг болон хоёр талд сэтгэл хангалуун байвал энэ бол сайн гэрээ. Тэрнээс нэг нь тавин санал тавиад, нөгөө нь аргумент болгоод, би их сайн гэрээ байгуулсан /Хөрөнгө оруулагчийн талаасаа/ гэж хэлж болохгүй. Монгол Улсын өмнө өнөөдөр хөрөнгө оруулагчдын итгэлийг сэргээх том ажил зогсож байгаа. Бид өөрсдөө дотоод гадаадын хөрөнгө оруулалтыг үргээсэн. Энэ тохиолдолд бид ярьж байгаа зүйл дээрээ их бодох ёстой гэдгийг хэлмээр байна.

Хоёрдугаарт: -Хөрөнгө оруулалт гэдэг бол Оюутолгой түүний дотор улс төрийн төсөл биш, энэ бол бизнесийн төсөл. Энэ бол эдийн засгийн төсөл.

Гуравдугаарт: -Энэ бол статик хөдөлгөөнгүй зүйл биш, динамик хөдөлгөөнтэй зүйл. Дэлхий өөрчлөгдөж байна. Хөрөнгө оруулалтын орчин өөрчлөгдөж байна. Энэ тохиолдолд хөрөнгө оруулалт өөрөө бизнесийн төсөл учраас циклийн хамрах хүрээ хэмжээгээр үе шатууддаа зайлшгүй өөрчлөлт хийх шаардлага гардаг. Би дахиад хэлье. Би Оюутолгойн мэргэжилтэн биш, гэхдээ гэрээ бол хоёр талдаа ашигтай зүйл гэдгийг маш сайн мэднэ. Тэгж байж сайн гэрээ гардаг. Тийм учраас хүмүүсийн асуултанд хариулахдаа зөвхөн энэ хүмүүс биш, ард иргэд, хөрөнгө оруулагч сонсож байна гэдгийг бодож ихээхэн ухаалаг хариулаасай гэж бодож байна. Танд амжилт хүсье!