Усын Их Хурлын эрхэм гишүүд ээ

Улсын Их Хурлын гишүүн С.Дэмбэрэл, Д.Арвин нарын 24 гишүүнээс 2014 оны 11 дүгээр сарын 25-ны өдөр Улсын Их Хуралд  өргөн мэдүүлсэн “Монгол Улсын Хүний эрхийн Үндэсний комиссын тухай хуульд” нэмэлт өөрчлөлт оруулах тухай хуулийн төслийн хэлэлцэх эсэх асуудлыг Хууль зүйн байнгын хороо 2014 оны 12 дугаар сарын  02-ны өдрийн хуралдаанаар хэлэлцлээ.

Хууль  санаачлагчид одоогийн дагаж мөрдөж байгаа хууль нь Монгол Улсын Үндсэн хуулийн заалттай зөрчилдсөн, бусад хууль тогтоомжтой уялдаа холбоо багатай, хүний эрхийн зөрчлийг таслан зогсоох, иргэдийн гомдлыг бүрэн шийдвэрлэхэд учир дутагдалтай, гомдлыг шийдвэрлэх ажиллагааг зохицуулаагүй тул эрх зүйн орчныг боловсронгуй болгох, Парисын зарчимд бүрэн нийцүүлэх, Нэгдсэн Үндэсний Байгууллагын хүний  эрхийн байгууллагаас өгсөн зөвлөмж, Монгол Улсын нэгдэн орсон олон улсын гэрээ, конвенцийн үзэл санааг тусгах зорилгоор  уг хуулийн төслийг боловсруулжээ.

Хэлэлцүүлгийн явцад Улсын  Их Хурлын гишүүн З.Энхболд хуулийн төсөлд Засгийн газраас 10 зүйлтэй санал өгсөний арвууланд нь шаардлагагүй, хасах, давхардсан, нэр дэвшигчид тавих шаардлагыг одоогийнхоос муутгасан, нийт 32 зүйлтэй хуулийн ихэнх заалтыг өөрчилсөн бөгөөд нэмэлт, өөрчлөлт гэж нэрлэсэн нь буруу гэж дүгнэсэн болон хууль санаачлагчийн яриад байгаа асуудлууд энэ хуулийн төслөөр шийдэгдэхээргүй байгаа тул хуулийн төслийг хэлэлцэх шаардлагагүй, Улсын  Их Хурлын гишүүн  Ж.Батзандан хуулийн төслийн 16.3 дахь хэсэг нь  шүүн таслах эрх мэдэлд шууд халдсан байх тул холбогдох хуультай нийцүүлэх, төслийн 18.7 дахь хэсэгт заасан  Комиссын бүрэн эрх нь хөдөлмөрийн шүүх шиг ойлгогдож байгаа учраас дахин  найруулах, төслийн 24.1 дэх хэсэгт хүний эрхийн олон нийтийн орон тооны бус зөвлөл нь одоо дагаж мөрдөж байгаа хуулийн 24.3 дахь хэсэгт заасан зөвлөлтэй давхардаж байгааг нягтлах, төслийн 4.1 дэх хэсгийн Комиссын гишүүнд улс төрийн өндөр мэдлэгтэй иргэнийг нэр дэвшүүлэх шаардлагатай эсэх, хүний  эрхийг хамгаалах мэргэжлийн байгууллага хууль тогтоомж, хуулийн төсөл, төрийн байгууллагын урьдчилсан хяналт тавих боломжийг авч үзэх, төслийн зүйл заалт нь Монгол Улсын Үндсэн хуультай зөрчилдсөн, шүүхийн бие даасан байдал, бүрэн эрхэд халдсан зүйл ажиллагдаж байгаа тул ажлын хэсэг байгуулж ажиллах шаардлагатай зэрэг санал гаргасан.

Улсын Их Хурлын гишүүн Д.Оюунхорол шүүхийн шүүн таслах үйл ажиллагаатай холбоотой байгаа тул төслийг намын бүлгийн хуралдаанаар хэлэлцүүлэх, Улсын Их Хурлын гишүүн Ц.Оюунбаатар зарим чиглэлд хүний тодорхойгүй хугацаагаар, олон сараар хорих, шүүхийн шийдвэр гүйцэтгэх, мөрдөн байцаах байгууллагад хүний  эрхийг зөрчих асуудал хавтгайрсан, хуулийн төслийн үзэл баримтлалыг Эрүүгийн байцаан шийтгэх хууль, олон улсын гэрээ, конвенцтой уялдуулан боловсруулах, Комиссын эрх, хариуцлагыг өргөжүүлж, хууль бус үйл ажиллагааг таслан зогсоох арга хэмжээг сайжруулах, төслийг хэлэлцэх явцад хүний эрхийг хамгаалах чиглэлээр ажилладаг иргэний нийгмийн байгууллагыг өргөнөөр оролцуулах, хуулийг өөрчлөх зайлшгүй шаардлагатай тул хуулийн төслийг хэлэлцүүлэх нь зүйтэй, Улсын Их Хурлын гишүүн Ц.Нямдорж төслийн 16.1.9-16.1.12 дахь заалт, 16.3, 18.7 дахь  хэсэг нь Монгол Улсын Үндсэн хуульд заасан шүүх эрх мэдлийн заалттай зөрчилдөж байгаа тул байцаан шийтгэх ажиллагааны эрх олгосон дээрх зүйл, заалтуудыг хасах, хууль хэрэгжихгүй, хүн хохирч байгаа нь хуульд биш, тухайн ажил хариуцсан хүний ажлын чадвартай холбоотой  болохыг анхаарах зэрэг саналыг гаргасан болно.

Монгол Улсын Хүний Эрхийн Комиссын тухай хуульд нэмэлт өөрчлөлт оруулах тухай хуулийн төслийг чуулганы нэгдсэн хуралдаанаар хэлэлцүүлэх нь зүйтэй гэсэн саналыг Байнгын хорооны хуралдаанд оролцсон гишүүдийн олонх нь дэмжээгүй болно.

Усын Их Хурлын эрхэм гишүүд ээ

Монгол Улсын Хүний Эрхийн Комссын тухай хуульд нэмэлт өөрчлөлт оруулах тухай хуулийн төслийг хэлэлцэх эсэх талаар Хууль зүйн байнгын хороноос гарсан санал, дүгнэлтийг хэлэлцэн шийдвэрлэж өгнө үү.

Анхаарал тавьсанд баярлалаа.