Улсын Их Хурлын Хууль зүйн байнгын хорооны 2014 оны 12 дугаар сарын 02-ны өдрийн  хуралданаар Монгол Улсын Хүний эрхийн Үндэсний Комиссын тухай хуульд нэмэлт, өөрчлөлт оруулах тухай хуулийн төслийн хэлэлцэх эсэх асуудлыг хэлэлцлээ. Хуулийн төслийн талаар УИХ-ын гишүүн С.Дэмбэрэл гишүүдэд танилцуулсан. Тэрбээр Монгол Улсын Үндсэн хуульд заасан хүний эрх, эрх чөлөөний талаарх үзэл санааг одоогийн мөрдөж байгаа Хүний эрхийн Үндэсний Комиссын тухай хуульд тусгаагүй байсныг тусгасан хэмээсэн. Түүнчлэн Комиссын УИХ-тай харилцах харилцааг тодорхой болгон, хүний эрх, эрх чөлөөний талаарх илтгэлийг жилд нэг удаа бус улирал тутам гарган УИХ-аар хэлэлцүүлэх, хүний эрх ноцтой зөрчигдсөн тохиолдолд авах арга хэмжээний талаарх тодорхой зохицуулалтыг тусгасан гэж тэрбээр илтгэлдээ дурдсан.

Үүний дараа гишүүд асуулт асуун, саналаа хэлсэн. УИХ-ын гишүүн Р.Бурмаа хүний эрх ноцтой зөрчигдсөн үед холбогдох этгээдийг батлан даалтад гарган, хууль зөрчсөн ажилтантай хариуцлага тооцох тухай хуулийн төсөлд тусгасан байгааг дурдаад хүний эрх ноцтой зөрчигдсөн гэдгийг хэн тогтоохыг тодруулж байлаа. Мөн УИХ-ын гишүүн Ц.Оюунбаатар ХЭҮК-ийн бүрэлдэхүүнийг томилох асуудалд өөрчлөлт орсон эсэхийг лавласан.

Хууль санаачлагч С.Дэмбэрэлийн хариулснаар ХЭҮК-ийн дэргэд мэргэшсэн Зөвлөл ажилладаг бөгөөд дээр Зөвлөлийн шинжээчдын дүгнэлтээр хүний эрх ноцтой зөрчигдсөн эсэхийг тогтоох юм байна.

ХЭҮК-ийн гишүүнийг Монгол Улсын Ерөнхийлөгч, УИХ-ын Хүний эрхийн дэд хорооны саналыг үндэслэн Хууль зүйн байнгын хороо нэр дэвшүүлнэ хэмээн хуулийн төсөлд тусгасан бөгөөд ингэхдээ иргэд, олон нийтийн саналыг авсан байна гэж нэмж тусгасан гэж хууль санаачлагч тайлбарласан.

Харин УИХ-ын гишүүн З.Энхболд, энэ хуулийн төсөлд Засгийн газар санал өгөхдөө 10 зүйлийг шаардлагагүй, давхардсан, хуучныг нь муутгасан, эсвэл хасах гэсэн санал ирүүлснийг дурдлаа. Мөн 32 зүйлтэй хуулийн 32 зүйлийг бүгдийг нь өөрчилсөн хуулийн төслийг нь нэмэлт, өөрчлөлт оруулах бус шинэчилсэн найруулга гэсэн байдлаар оруулж ирэх нь зүйтэй байсан гэж Засгийн газрын саналд тусгагдсан байсныг нэмж хэлсэн. Тэрбээр, хуулийг өөрчилснөөр ХЭҮК-той холбоотой асуудлууд шийдэгдэхгүй нь харагдаж байна гээд Засгийн газрын саналыг үндэслэн хуулийн төслийг хэлэлцэхгүй байх нь зүйтэй гэлээ. УИХ-ын гишүүн Ц.Нямдорж, хуулийн төслийг харахад байцаан шийтгэх үйл ажиллагааны эрхийг ХЭҮК-т олгосон зүйл байна. Хуулийн төслийг хэлэлцвэл энэ мэт зүйлийг хасаад явах байх гээд хүнийг үндэслэлгүйгээр хорьж цагдсан асуудал гарвал энэ нь хуультай холбоотой бус хариуцаж буй ажилтны буруугаас болсон байдгийг тодруулж хэлж байлаа. Үндэслэлгүй хүнийг хорьж цагдсан байвал прокурор, шүүгч ч суллах эрхтэй гэдгийг тэрбээр сануулж хэлээд эрүүгийн байцаан шийтгэх ажиллагаанд ХЭҮК-ийг оролцуулах зүйл байж болохгүй гэсэн юм. Гишүүд ийнхүү саналаа хэлсний дараа хуулийн төслийг хэлэлцэх эсэх асуудлаар санал хураалт явуулахад хуралдаанд оролцсон 11 гишүүний 72.7 хувийн саналаар хэлэлцэхийг дэмжсэнгүй.