МОНГОЛ УЛСЫН ИХ ХУРЛЫН 2014 ОНЫ НАМРЫН ЭЭЛЖИТ ЧУУЛГАНЫ 11 ДҮГЭЭР САРЫН 13-НЫ ӨДРИЙН НЭГДСЭН ХУРАЛДААНЫ ТЭМДЭГЛЭЛЭЭС ХҮРГЭЖ БАЙНА.
Ховд аймгийн Эрдэнэбүрэн суманд усан цахилгаан станц барихдаа холбогдуулан ажилуулах төслийн нэгжийн зардалд зориулж, уул уурхайн эрчим хүчний сайдын урсгал зардалд 500 сая төгрөг нэмж тусгах асуудлыг хэлэлцэх үеэр
Улсын Их Хурлын гишүүн С.Дэмбэрэл:Төсвийн байнгын хорооны дарга, ажлын хэсгийн ахлагчаас асуух асуулт байна.
Нэгдүгээрт: Эдийн засгийн байнгын хорооноос, 2015 оны төсвийг хэлэлцээд, хэд хэдэн санал явуулсан, тухайлбал объектыг нэмэх тухай. Үүнээс хамгийн чухал нь зарчмын найман санал байсан. Үүнийг та бүхэн нэг бүрчлэн нухацтай авч үзэх хэрэгтэй.
Улсын Их Хурлын дарга З.Энхболд: С.Дэмбэрэл гишүүнээ зөвхөн Ховд аймгийн Эрдэнэбүрэн сумын 500 сая төгрөгийн тухай асууна.
Улсын Их Хурлын гишүүн С.Дэмбэрэл: Би Ховд аймгийн асуудал руу орно. Ховд аймгийн Эрдэнэбүрэн сумын усан цахилгаан станц барих ажил нь дараагийн асуудалтайгаа холбоотой . Үүнийг авч хэлэлцсэн үү?
Хоёрдугаарт: 2015 оны Монгол Улсын төсвийг дөнгөж сая баталлаа. “Ховд аймгийн Эрдэнэбүрэн суманд усан цахилгаан станц барих” асуудлыг ярихаасаа өмнө та бүхэн үүнийг мөнгөний бодлоготой хэрхэн уялдуулсан бэ? “Төсвийн зохистой бодлого” гэдэг өгүүлбэрийг ойлгодог байх гэж найдаж байна. Цаашид зүгээр нэг Ховд аймаг, радио телевиз гэж явсаар, эцсийн дүндээ 2015 оны төсөв чинь мөчлөг сөрөх шинж чанартай төсөв болж чадахгүй юм байна шүү. Та бүхэн төсвийн байнгын хороог удирддагын хувьд ер нь бодлогын ойлголт байна уу, үгүй юу? За, Баярлалаа.
Улсын Их Хурлын дарга З.Энхболд: Төсвийн байнгын хорооны дарга Б.Даваасүрэн энэ саналтайгаа холбогдуулан товчхон хариулья.
Төсвийн байнгын хорооны дарга Б.Даваасүрэн: Байнгын хорооноос ажлын хэсэгт "Аль болох эдийн засгийн нөхцөл байдалтайгаа уялдуулан хэмнэх чиглэлд анхаар" гэж үүрэг өгч ажилласан. Үүний дагуу урсгал зардлаас 160 тэрбум төгрөг хасагдаж, өсөж байгаа нь 7.6 тэрбум төгрөгөөр хөрөнгө оруулалтын арга хэмжээнүүдэд орсон. Ажлын хэсэгт нэг бүрчлэн яригдсан байгаа. Таны эдийн засгийн байнгын хорооноос гаргасан саналыг би ажлын хэсэгт нэг бүрчлэн яриараарай гээд шилжүүлсэн. Тэгэхээр яригдсан гэж ойлгож байна. Ажлын хэсгийн даргаас асууна уу.
Tweet
