Улсын Их Хурлын 2014 оны намрын ээлжит чуулганаар хэлэлцэх асуудлын тухай Улсын Их Хурлын тогтоолын төсөл хэлэлцэх үеэр
Төрийн байгуулалтын байнгын хорооны ажлын албаны зөвлөх О.Тунгалаг, Ж.Бямбадулам, референт Б.Хатантуул, Ц.Мөнхтуяа, С.Энхцэцэг нар байлцав. Улсын Их Хурлын тогтоолын төслийг Улсын Их Хурлын гишүүн А.Бакей танилцуулав.
Танилцуулгатай холбогдуулан Улсын Их Хурлын гишүүн М.Энхболд, С.Дэмбэрэл нарын тавьсан асуултад Улсын Их Хурлын гишүүн А.Бакей хариулж, тайлбар хийв.
Улсын Их Хурлын гишүүн М.Энхболд, С.Дэмбэрэл, М.Батчимэг нар санал хэлэв.
С.Дэмбэрэл: - 8-д байгаа татварын хууль тогтоомжид нэмэлт, өөрчлөлт оруулах тухай хуулийн төсөл гэж байна шүү дээ. Тэр маань одоо Улсын Их Хурлын даргын захирамжаар байгуулагдсан ажлын хэсэг энэ татварын тухай бүх хуулиудыг, /дотор нь нэмэлт өөрчлөлт ч биш, шинэчилсэн найруулга ч байгаа/ бүр, тогтолцооны өөрчлөлт хийх тухай ч тийм хуулийн төслүүд орж ирж байна. Тэгэхээр энэ бүхнийг нь томъёолохдоо “татварын шинэчлэл хийх тухай багц хуулиудыг” гэсэн тийм томъёоллоор бичмээр байна. Багц хуулиудын төсөл гэсэн ийм томъёоллоор оруулбал, нөгөө Улсын Их Хурлын гишүүдийн өргөн барьж байгаа бүх, татвартай холбоотой бүх хуулиуд энд ингээд тусгагдаад орчихно. Засгийн газрын ч, Их Хурлын даргын захирамжийн ч үзэл санаанд нийцнэ. Тийм учраас ийм байдлаар засуулмаар байна. Үүнийг одоо зарчмын зөрүүтэй санал гэж үзэх үү. Найруулгын шинж чанартай санал гэж үзэх үү?
А.Бакей: - За тэгэхээр би түрүүн хэлсэн. Жагсаалтын талаар хууль санаачлагчаас албан ёсоор санал авсан. Ингэхэд бол Засгийн газраас Төсвийн байнгын хорооноос яг ийм томъёоллоор оруулж ирсэн. За энэний зэрэгцээ Улсын Их Хурлын даргын захирамжаар одоо татварын багц хуульд иж бүрэн шинэчлэл хийх ажлын хэсэг байгуулагдаж бас ажиллаж эхэлж байгаа.
За ямар ч утгаар аваад үзсэн одоо ирэх намрын чуулганаар татварын цогц шинэчлэл бол хэлэлцэгдэж эхэлнэ гэж бодож байна. Зүгээр томъёоллын хувьд бол та нар одоо заавал тэгж томъёолно гэвэл санал хураалгах нь зүйтэй гэж бодож байна.
С.Дэмбэрэл: - Би өөрийгөө хууль тогтоогч л гэж ойлгодог шүү дээ. Тэгэхээр одоо би энэ төсөл дээр саналаа өгч байна. Тэр 8 дугаар зүйлийг л сая томъёолчихлоо. Татварын хуулиудад шинэчилсэн найруулга, нэмэлт өөрчлөлт оруулах хуулийн багц төслүүдийг хэлэлцэх гэж. Хуулиудын багц төсөл гэдэг юм уу. Тийм томъёоллоор л оруулчихмаар байх юм. Тэгвэл дараа нь ямар нэгэн маргаан гарахгүй. Тэртээ тэргүй одоо ажлын хэсгийн ахлагч сууж байна. Бид эртээд ажлын хэсэг дээрээ ярьсан шүү дээ.
Намрын чуулганаар нэлээн дорвитой юм оруулъя. Одоо яах вэ ингээд Засгийн газрын оруулж ирсэн тэр нэмэлт, өөрчлөлтийн хоёр гурван хуулийг ингээд энэ чуулганаар баталж чадвал тэр биз. Баталж чадахгүй бол намрын чуулганаар үүнийгээ хамт оруулаад, татварын тогтолцоондоо иж бүрэн шинэчлэлт хийх. Ажлын хэсгийн гишүүд бүгд санал нэгдсэн байгаа. Тийм учраас томъёоллынх нь хувьд ингээд оруулчихъя. Нэгдүгээрт.
Хоёрдугаарт, ер нь бол энэ Төсвийн байнгын хороон дээр зөвхөн энэ татварын асуудлыг дангаар нь хэлэлцэнэ гэдэг маань татварын асуудлыг өрөөсгөлөөр буюу пескал талаас нь харж байна гэсэн үг шүү дээ. Эдийн засгийн өсөлтийг нэмэгдүүлэх. Энэ чиглэлээс нь бизнесийн орчинг сайжруулах чиглэлээс нь дутуу хардаг. Тийм учраас энэ ганцхан Төсвийн байнгын хорооноос татварын тухай хууль санал авчихаад энийг одоо төгсгөлийн эцсийн болсон санал гэж үзвэл учир дутагдалтай. Энэ талаас нь бодож энэ 8 дугаар юуг ингэж томъёолж байгаа юм. Энийг одоо санал хураалгаж өгнө үү гэж.
А.Бакей: - С.Дэмбэрэл гишүүнээс зарчмын зөрүүтэй санал ирсэн байгаа. Жагсаалтын 8 дахь заалт буюу Татварын хууль тогтоомжид нэмэлт, өөрчлөлт оруулах тухай хуулийн төсөл гэдгийг татварын хуулиудад шинэчилсэн найруулах, нэмэлт, өөрчлөлт оруулах багц хуулийн төслийг нэмж оруулах. Томъёолол жаахан юу байна. Тийм ээ. Татварын багц хуульд шинэчилсэн найруулга хийх гэсэн маягаар оруулж өгөөчээ гэсэн ийм хүсэлт тавьсан байгаа. За энэ С.Дэмбэрэл гишүүний саналыг дэмжиж байгаа гишүүд гараа өргөнө үү. Их Хурлын даргын захирамжаар ажлын хэсэг байгуулагдсан учраас.
Зөвшөөрсөн: 8
Татгалзсан: 3
Бүгд: 11
Гишүүдийн олонхын саналаар дэмжигдлээ
Tweet
