МОНГОЛ УЛСЫН ИХ ХУРЛЫН 2014 ОНЫ ХАВРЫН ЭЭЛЖИТ ЧУУЛГАНЫ
ТӨРИЙН БАЙГУУЛАЛТЫН БАЙНГЫН ХОРООНЫ 6 ДУГААР САРЫН 24-НИЙ ӨДӨР /МЯГМАР ГАРИГ/-ИЙН ХУРАЛДААНЫ ДЭЛГЭРЭНГҮЙ ТЭМДЭГЛЭЛЭЭС
Хоёр. Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төсөл /Засгийн газар 2014.06.20-ны өдөр өргөн мэдүүлсэн, хэлэлцэх эсэх/.
Төсөл санаачлагчийн танилцуулгыг Улсын Их Хурлын гишүүн Х.Тэмүүжин танилцуулав.
Р.Гончигдорж: - Гишүүд саналаа хэлье. С.Дэмбэрэл гишүүн.
С.Дэмбэрэл: - Монгол Улс маань их сайхан улс юмаа. “Их сайхан амардаг улс”. Би одоо энэ орж ирсэн юмыг “Ашгүй хэд хоног амрах нь” гэж их “дэмжиж байгаа”. Тэгэхээр яагаад амардаг юм бэ гэхээр, зун тэртээ тэргүй хэн нь ч ажил хийдэггүй л байхгүй юу. Хэн ч ажил хийдэггүй. Зөвхөн хувийн хэвшлийнхэн л ажил хийдэг. Төрийн байгууллагуудыг амрахаар хувийн хэвшлийнхэн шүүрс алдаж, санаа алдаж, баярладаг байхгүй юу. “Ашгүй дээ. Эд нар илүү олон хоног амраасай” гэж баярладаг. Нэгдүгээрт.
Хоёрдугаарт, Их Хурлын гишүүд бид нар өөрсдөө хамгийн их амардаг хүмүүс байхгүй юу. Зунжингаа амардаг. Уучлаарай. Бүгд амардаггүй. Тойргоор явна гэдэг чинь нэг ёсны амралт. Би ер нь саналаа хэлчихье. Тийм ээ. Тийм учраас хамгийн их амардаг хүмүүс, амардаггүй хүмүүсийн тухай энэ хэдэн өдрийн, хоёр өдрийн тухай ярилцаад байгаа нь өөрөө их шог байна л даа. Их Хурлын гишүүд үнэхээр ажиллая гэвэл Зуны чуулган гэж хийх ёстой байхгүй юу тэгвэл. Хаврын чуулган, намрын чуулган, зуны чуулган гээд. Тэгж байж энэ улс бүгдээрээ амрахгүй талаар ярих моральный /ёс суртахууны/ эрхтэй байна уу гэхээс биш өөрсдөө хамгийн их амардаг мөртлөө хүмүүсийг амруулахгүй гээд байж болохгүй шүү дээ. Тэр байтугай хүүхдийн баярыг нь хасчихъя ч гэх шиг. Энэ улс орны энэ ард иргэд чинь өөрсдөө амралт ажлаа зохицуулаад ирчихсэн. Хуультай, хуульгүй тэрийгээ тэмдэглээд явдаг юм уг нь бол. Тийм учраас энэ 2 хоног нэмэхийг би дэмжиж байна. Тэртээ тэргүй энэ чинь өөрөө амраад л явчихдаг юм.
За тэгээд та нар бод. Одоо жишээлбэл 3 хоног амарлаа гэхэд хэзээ тойрог руугаа явж байсан юм. Бүгд аймаг руу явдаг биз дээ. Тойрогтоо очих нэрийдлээр аймаг руугаа явж байгаа шүү дээ. Хүлээж бай. Би өөрийнхөө саналыг хэлье. Та нар дараа нь хэлээрэй. Хүлээж бай. Тийм учраас Улсын Их Хурлын, хамгийн их амардаг хүмүүс нь, амардаггүй хүмүүсийн асуудлыг шийдэх ёс суртахууны эрх байна уу гэдэг суурь асуулт гарч ирнэ. Амрах гэдэг байна шүү дээ тархиа хэр зэрэг ажиллуулж байна гэдгээр бас хэмждэг юм шүү дээ. Километрээс гадна. Хүний оюун ухаан хэр зэрэг зарцуулагдаж байна гэдгээр. Тэр нь тэгээд хэр зэрэг үр дүн өгч байна гэдгээр бас хэмждэг юм. Тийм учраас үүнийг бүтээмж гэдэг юмаар хэмжчихдэг юм. Тийм учраас 5 хоногийг дэмжиж байна. Өөрсдөө аягүй их амардаг хүмүүс ийм юман дээр жаахан болгоомжтой хандаж ярьсан нь дээр байхаа гэж бодож байна.
Р.Гончигдорж: - Амралт гэдгийн тухай л маргаан боллоо. Тэрнээс өөр юм болсонгүй. Тийм ээ. Өөрийн мэдлээр бүх ажлаа зохион байгуулж болох боломжоор бүрэн хангагдсан өдрийг амралтын өдөр гэнэ гэж тодорхойлъё. Тийм ээ. Бие биенийгээ ойлгож бай л даа. Серьёзные хэлж байгаа. Яаж хэлж байгаа.
Р.Бурмаа: - С.Дэмбэрэл гишүүн ээ. Наад үгээ татаарай. Бид нар бол листээр сонгогдсон ч гэсэн энэ дээр, юун дээр ажилладаг шүү дээ. Орон нутагт томилолтоор ч явдаг. Хууль дүрэмтэй.
С.Дэмбэрэл: - Би томилолтоор явдгийг үгүйсгээгүй байна шүү дээ. Монголчуудын ихэнх нь, угаасаа зун бүгдээрээ амардаг. Ажлаа хийнгээ амардаг байлгүй дээ. Нэг их эмзэглээд байх юм байхгүй шүү дээ.
Р.Гончигдорж: - Ер нь бол С.Дэмбэрэл гишүүн ээ. Бараг гишүүдээсээ уучлал гуйчих нь зөв байхаа гэж бодож байна.
С.Дэмбэрэл: - Би энэ дээр огт уучлал гуйх шаардлагагүй гэж бодож байна.
Р.Гончигдорж: - За ойлголоо. За ингээд үг хэлэх гишүүд дууслаа. Санал хураалтдаа оръё.
Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай хуулийн төслийг хэлэлцье гэсэн саналыг дэмжиж байгаа гишүүд гараа өргөнө үү. Дэмжиж байгаа гишүүд.
16-аас 9. Хэлэлцэх нь зүйтэй гэж дэмжигдлээ.
Tweet
