МОНГОЛ УЛСЫН НЭГДСЭН ТӨСВИЙН 2015 ОНЫ ТӨСВИЙН ХҮРЭЭНИЙ МЭДЭГДЭЛ, 2016-2017 ОНЫ ТӨСВИЙН ТӨСӨӨЛЛИЙН ТУХАЙ ХУУЛИЙН БОЛОН “ЧИГЛЭЛ ӨГӨХ ТУХАЙ” УЛСЫН ИХ ХУРЛЫН ТОГТООЛЫН ТӨСӨЛ /АНХНЫ ХЭЛЭЛЦҮҮЛЭГ/

С.Дэмбэрэл: Сүүлийн үед Засгийн газрын эдийн засгаа үнэлж дүгнэдэг, урьдчилж хардаг, төсөөлдөг чадавхи нь нэмэгдээд байгаа гэж би бодож, их бахархаж байгаа. Яагаад гэвэл бид эдийн засгаа улам сайн харах тусам, зөв тооцоолох тусам бидэнд хэрэгтэй. Инфляцийг ямар байхыг 6, 7, 8 гээд гурван оны байдлаар бодсон байгаа. Инфляцийг тооцож байгаа хэрэглээний үнийн индекс чинь өнөөгийн, 2013 оны өрхийн зарлагын бүтцээр авч үзэх юм бол хүнсний зүйлийн хэрэглээ 24-40 орчим хувь байгаа. Өөрөөр хэлбэл инфляцийг тооцохдоо ард түмнийхээ амьдралын дундаж амьжиргааны хэрэглээний 24-40 хувьд нь тооцоод та бүхнийг 6, 7, 8 гэсэн тоогоо гаргасан байх аа гэж бодож байна. Миний асуух гэж байгаа гол асуулт бол ДНБ-ний дифлятор 2015, 16, 17 онд та бүхэн хэд байна гэж төсөөлж байгаа вэ? Яг тодорхой тоог надад хэлж өгнө үү. Яагаад гэвэл энэ хоёрыг харьцуулж харж байж цаашдын хандлагыг харахгүй бол одоо бидний CPI-р тооцсон тооцоо чинь өөрөө худлаа шүү гэдгийг хэлж байна.

Ч.Улаан: Инфляцийг бид бүхэн зах зээлд зөв сигналь өгөх эдийн засгийн бодлогын эерэг үр дагаварыг өөртөө шингээсэн тийм л үзүүлэлтийн түвшинд төсөөлдөг. Түүнээс биш инфляцийг яг онож зөв төлөвлөж чаддаггүй нь ойлгомжтой. Тийм учраас байгаа түвшнээс их өндөр дохиоллыг зах зээл рүү өгөх юм бол бодлого үйл ажиллагаа маань мууднаа гэсэн дохиолол болж зах зээлийг таагүй байдалд оруулна. Ер нь хэрэгжүүлж байгаа бодлогынхоо чиг хандлагыг харгалзаад бид нар аль болохоор эерэг түвшинд зөв сигналь өгөх, инфляцыг бууруулахад бүх бодлого үйл ажиллагаа чиглэгдэж байх тэр бодлогыг харгалзан үзэж ингэж төсөөлдөг. Мэдээжийн хэрэг инфляцийн тооцоонд хэрэглээний бүтцийг харгалзан үзэж байгаа. Хэрэглээний бүтэц дотор хүн амын хүнсний хэрэглээ 24-40 хүртэл байгаа гэдэг үзүлэлт нь өөрөө тийм ч муу үзүүлэлт биш гэдгийг та бүхэн сайн мэдэж байгаа гэдэгт би эргэлзэхгүй байна. Үүний цаана үлдэж байгаа нэлээд хэсэг нь өндөр үнэтэй, удаан хугацаанд хэрэглэгдэх эд зүйлд зарцуулагдаж байгаа нь тодорхой байгаа. 

Г.Батхүрэл /Эдийн засгийн хөгжлийн яамны Хөгжлийн бодлого, стратеги, төлөвлөлт, зохицуулалтын газрын орлогч дарга/: Инфляцийн хувьд хэрэглээнийн үнийн индекс дахь жингээр нь аваад үзэхэд 30 хувийг хүнсний бүлгийн бараа эзэлж байгаа, 70 хувийг хүнсний бус бүлгийн бараа эзэлдэг. Үүн дээр ялангуяа хүнсний бус бүлгийн барааны хувьд импортын бараа бүтээгдэхүүн дээр ханшны нөлөө нилээд их байдаг. Бид нар сагсны 12 бүлгийг аль аль хэсэг нь импортын бараа бүтээгдэхүүнээс хамаарч байна вэ гээд 12 бүлэг тус бүрд нь авч үзсэн байгаа. Үүнээс авч үзэхэд 0.36 гэдэг жин нь ерөнхийдөө импортын бараа бүтээгдэхүүн байгаа учраас энэ нь ханшны нөлөөлөлд нилээд их өртөмтгий юм байна гэсэн байдал ажиглагдаж байгаа. Харин таны асуусан ДНБ-ний дифляторын хувьд бид нар хэрэглээний үнийн индекс дээр тооцсон үзүүлэлт инфляцийн түвшнээс арай доогуур авч үзсэн байгаа. Тухайлбал, 2014 оны дифлятор 8.7, 2015 оных 4.7, 2016 оных 5.5, 2017 оных 3.6 хувь гэж тооцсон байгаа.

УЛСЫН ИХ ХУРЛЫН 2014.05.30-НЫ ӨДРИЙН НЭГДСЭН ХУРАЛДААНЫ ТЭМДЭГЛЭЛЭЭС