УИХ-ЫН 2014.05.02-НЫ ӨДРИЙН НЭГДСЭН ХУРАЛДААНЫ ТЭМДЭГЛЭЛЭЭС:

АЖЛЫН ХЭСГИЙН ГИШҮҮД ХООРОНДОО МЭТГЭЛЦЭЖ БАЙЖ ТУХАЙН АСУУДЛААС ОНОВЧТОЙ, ҮНЭН САНАА ГАРГАНА

Тогтоолын төслийн хавсралтад дор дурьдсан агуулга бүхий дэд заалт нэмэх. Бодлогын залгамж чанар, тогтвортой байдлыг хангах хүрээнд хөгжлийн бодлого төлөвлөлтийн тухай хуулийн төслийг боловсруулж өргөн мэдүүлэх. Ажлын хэсэг санал гаргаж, байнгын хороо дэмжсэн.

С.Дэмбэрэл: Уг нь бол би энэ ажлын хэсгийн гишүүн. Гэхдээ нэлээд хэдэн заалтууд дээр цөөнх болсон. Энэ тухайгаа тэмдэглүүлээгүй, шаардлага ч байхгүй гэж бодож байна. Эдийн засгийг идэвхжүүлэх энэ төлөвлөгөө маань эдийн засгийг идэвхжүүлээд санхүүүгийн тогтвортой байдлыг хангана гэдэгт нь би яг ийм хэлбэрээр бол итгэхгүй байна. Энэ санаагаа эхлээд хариуцлагатайгаар хэлье. Санхүүгийн тогтвортой байдлыг хангах талаар ямар заалт орсон бэ? Ямар ч заалт ороогүй. Валютын ханшийг тогтвортой байлгах талаар ямар арга хэмжээ авах гэж байгаа юм? Бас л ямар ч заалт ороогүй шүү дээ. Хөгжлийн төлөвлөлт гэж орсон нэг заалт байгаа. Шударга хэлэхэд энэ заалт бол энд үнэндээ хэрэггүй шүү дээ. Ажлын дэд хэсгийнхэнтэй уулзаж байхад удирдамж гээд нэг цаас өгч байсан. Удирдамжтай нь танилцсан чинь уучлаарай, яг л манай хуучин сэтгэлгээ. Бүх яамдын хэтийн чиглэл энэ тэр баахан зүйл бичсэн. Олон улсын байгууллагуудын гаргасан 10 индекс л байгаа биз дээ. Хүний хөгжлийн индексийг оролцуулаад. Энэ 10 индексээ “зоож” тавьчихаад, түүндээ хүрэх тодорхой зорилтуудыг гаргаж тавьбал дээр биш үү? Бид өөрсдөө тоохгүй байгаа болохоос биш, тогтвортой хөгжил гэж дэлхий нийтээрээ яриад, бүр үйл ажиллагаагаа хэрэгжүүлээд эхэлчихсэн шүү дээ. Миний бодлоор бол энэ дотор чинь тогтвортой хөгжлийн концепци байх ёстой биш үү. Товчхондоо бол энэ дотор орсон заалтуудыг харахад уучлаарай, оруулах зүйл байхгүй байсан юм шиг хүчээр хэдэн заалт оруулсан байна. Ийм юмыг бид нар энд батлах гээд хуралдаж байна. Олонхоороо батлана. Ийм зүйлийг батлаад манай бизнес эрхлэгчдэд хөгжлийн төлөвлөлтэй болох тийм сайхан зүйл болох юм уу? Бизнес эрхлэгчдэд яг ямар “message” өгөх гэж байгаа юм. Яг ямар тодорхой үйл ажиллагаа хийгдэх юм. Байхгүй байна. Эдийн засгийн өршөөл, татварын шинэчлэл хоёрыг эс тооцвол шүү дээ. Татварын шинэчлэл гэж хүртэл хэлж чадахгүй байгаа шүү дээ. Ажлын хэсгийнхэн. Төлөвлөгөө хэрхэн хийдгийг нэгдэх өдөр сонин дээрээс харцгаагаарай. Алтернатив төлөвлөгөөг нь 5 хуудас боловсруулаад ажлын хэсэгт өгсөн. Эсвэл ойлгохгүй, эсвэл хэрэгжиж байгаа гэдэг нэрийдлээр бүгдийг нь хассан. Эдийн засгийн байнгын хорооны хуралдаан дээр сууж байгаа бүх гишүүд нь дэмжээд байхад 4 санал унасан. Тэрний учир нь 17 хүн бүртгүүлээд сууж байхад энэ нь цөөнх болоод асуудал маань унадаг юм байна лээ. Иймэрхүү байдлаар л хийж байгаа. Бодит үнэнээс битгий зугтаа, хамт олны сэтгэлгээ заавал үнэн байх албагүй. Цөөнх заримдаа үнэн үг хэлж болдог. Жишээ нь энэ тогтоолд хямралтай байдлын үед хэрэгжүүлэх нийгмийн хамгааллын ямар механизм орсон бэ? Нэг ч заалт байхгүй. Валютын ханшийг тогтворжуулах ямар алхам орсон бэ? Тогтсон аргачлалаар, эх сурвалж гэсэн л үг байгаа. Бодитойроо бол ийм л зүйл байгаа шүү дээ. Бичил, жижиг, дунд, том бизнесүүдийг тус тусд нь дэмжих яг тодорхой ямар заалтууд орсон бэ? Намайг ийм эсрэг санал хэлэхээр “чи ажлын хэсгийн гишүүн шүү дээ Дэмбэрэлээ” гээд байх юм. Тийм би ажлын хэсгийн гишүүн. Ажлын хэсгийн гишүүд бусдаасаа өөр бодолтой байж болдоггүй юм уу? Яагаад мэтгэлцэхгүй байгаа юм. Ажлын хэсэг гэдэг маань миний бодлоор мэтгэлцэж байж тэр дундаасаа оновчтой, үнэн санааг гаргадаг. Түүнээс биш нэг зүйлийг хайрцаглачихаад, түүнийгээ эвдэхгүй гэж үздэг ажлын хэсгээс хэзээ ч бүтээлч санаа гарч ирдэггүй юм.