Санхүүгийн зохицуулах хорооны Хяналтын зөвлөлийн гишүүдийг томилох, чөлөөлөх тухай Улсын Их Хурлын тогтоолын төслийг хэлэлцсэн 12 дугаар сарын 26-ны УИХ-ын нэгдсэн хуралдааны тэмдэглэлээс:

С.Дэмбэрэл: - Санхүүгийн зохицуулах хорооны цаашдын үйл ажиллагааны талаар шийдвэр гаргах ёстой хүмүүсийн шинэ бүрэлдхүүнийг хараад сууж байна. Та бүхнийг би үнэндээ сайн мэдэхгүй юм. Ямар ажил, яаж хийж байсан бэ гэдгийг ч мэдэхгүй байна. Санхүүгийн салбартай ойрхон байсан хүмүүс биш гэдэг нь л лавтай байна. Мэдээж, заавал санхүүгийн салбарт ойрхон хүн байх ёстой гэсэн шаардлага байхгүй л дээ. Та бүхэнд анхааруулж хэлэхэд:

Нэгдүгээррт, Одоогийн байдлаар, санхүүгийн секторын шинэчлэл, шинэтгэл тулгамдсан асуудал болоод байна. Энэ бол 2014 оны эхний улиралд багтаж орж ирэх ёстой бичиг баримт шүү.

Хоёрдугаарт, санхүүгийн секторт (95:5) гэсэн эрүүл бус харьцаа үүссэн байгаа. Энэ харьцааг өөрчлөх чиглэлээр, мөн танай СЗХ-ны удирдлагад байдаг Банк бус байгууллагууд болон бусад санхүүгийн корпорациудтай хамтраад зээлийн хүү санхүүгийн жамаар буурах нөхцөлийг бий болгох ёстой. Энэ тал дээр та бүхний шийдвэр гарах ёстой.

Гуравдугаарт, Саяхан СЗХ дээр хийгдсэн шалгалтын дүгнэлт удахгүй танай дээр очно. Тэр дүгнэлтийг шинэ бүрэлдхүүнээрээ үзээд, түүн дээр маш тодорхой өгөгдсөн даалгаваруудыг хэрэгжүүлэх чиглэлээр юу хийх вэ гэдгээ УИХ-д эргэж мэдээлэх хэрэгтэй. Ерөнхийдөө банкны байгууллага давамгайлсан одоогийн санхүүгийн секторын үүргийг өөрчлөн шинэчлэх эдийн засгийн шинэтгэл болон цаашдын салбарын хөгжил дэвшилд танай Хорооны үүрэг оролцоо асар их хэрэгтэй байгаа шүү. Энэ бол зөвхөн хөрөнгийн биржийн асуудал биш, банкбус санхүүгийн байгууллага, хадгаламж зээлийн хоршоод төдийгүй, одоо хүртэл зохицуулалтанд ороогүй байгаа Ломбардуудын асуудлыг хүртэл танай Хороо өөрсдийн санаачлагаар авч үзэж, судалгаа хийж шийдвэрлэх ёстой. Тэгэхгүй бол энэ улсад бичил санхүүжилтийн ийм нэг хэлбэр бараг л мөнгө хүүлэх аргаар ажиллаж, энэ нь хэний ч анхааралд өртөхгүйгээр үйл ажиллагаагаа явуулж байна. Хэн ч тэднийг тоож, авч үзэхгүй байна. Уг нь санхүүгийн үйлчилгээг зохицуулагч гэсэн утгаараа танай хороо үүнийг анхаарч ажиллах, санаачлагатай хандаж, тодорхой дүрэм, журам, зохицуулалт оруулж ирэх ёстой. Үүнд, шинээр сонгогдож байгаа гишүүд та бүхэн бүтээлчээр хандах хэрэгтэй. Одоо та нарт миний хэлж байгаа зүйл буухгүй байгаа. Зарим нь, шулуухан хэлэхэд ойлгохгүй байгаа. СЗХ-ны зөвлөл маш чухал шийдвэр гаргах ёстой. Энэ эдийн засгийг бүхэлд нь, тэр дундаа санхүүгийн секторыг бодит сектортой нь холбох бодлогыг илүү өргөнөөр харах ёстой юм. Түүнээс биш ямар нэг хууль, дүрэм журамд өөрчлөлт оруулах, санхүүгийн салбарт ажиллаж байгаа операторуудыг тэр хууль, дүрэм журмуудаараа скоч /туузан наалтуур/ шиг ороож суух ёсгүй. Түрүүн миний хэлсэн тэрхүү буруу харьцааг эвдэх, үгүй ядахдаа (80:20) болгон өөрчлөх талаар иймэрхүү тодорхой зорилт тавиад ажиллах хэрэгтэй. Даатгалын байгууллагууд, банк бус санхүүгийн байгууллагууд, үнэт цаасны арилжаа эрхлэгчид, бусад санхүүгийн секторын операторуудыг жинхэнэ харилцаа, яриа, хамтын ажиллагааны механизмыг бүрдүүлэх нь 2014 оны СЗХ-ны шинэ үүрэг, зорилт шүү. Үүнд онцгой анхаарахыг та бүхэнд сануулж байна. Амжилт хүсье. Баярлалаа.