Нийтийн сонсголын тухай хуулийг хэлэлцэх үеэр /2015.01.21/
УИХ-ын түвшинд 2008 оны долдугар сарын 1-ний үймээний хэрийн асуудлаар, Хан-Уул дүүргийн ИТХ-аас нэхмэлийн шар байруудыг нурааж дахин төлөвлөх асуудлаар нээллтэй сонсгол хийж байжээ. Гэвч нээлттэй сонсгол хийх нь тогтмол болоогүй, хууль эрх зүйн орчин хангалтгүй байснаас өнгөрсөн хугацаанд ердөө 10 гаруй удаа нээлттэй сонсгол хийсэн байдаг аж. Тиймээс Монгол Улсын Ерөнхийлөгчийн “Том төрөөс ухаалаг төр рүү” шилжих санаачлагыг хэрэгжүүлэх төрийн үйл ажиллагаа иргэдэд нээлттэй, ил тод байлгах, төрийн шийдвэр боловсруулах, хэлэлцэх, батлах, хэрэгжилтийг нь хянах бүхий л үйл ажиллагаанд иргэд оролцож, үзэл бодлоо чөлөөтэй илэрхийлэх, шийдвэрт саналаа тусгах боломж, нөхцлийг бүрдүүлэхэд нийтийн сонсголыш явуулах хууль эрх зүйн орчныг бүрдүүлэх зайлшгүй шаардлагатай гэж үзэн Нийтийн сонсголын тухай хуулийн төслийг санаачлан боловсруулж УИХ-д өргөн барьсан. Ингээд Нийтийн сонсголын хуультай болох шаардлага, ач холбогдлын талаар УИХ-ын гишүүн С.Дэмбэрэлийн байр суурийг хүргэж байна.
УИХ-ын гишүүн С.Дэмбэрэл: Хуулийн төслийг хэлэлцэхийг дэмжиж байгаа. Төсөл санаачлагчид нийтийн сонсголыг бий болгож, сайнаар хэрэгжүүлсэн улс орны туршлагыг судлах хэрэгтэй. Жишээ нь, АНУ-ын конгрес хуулийн, хяналт шалгалтын, мөрдөн шалгах, батлах, газар дээр нь очих гэсэн хэлбэрээр нийтийн сонсголыг хэвшүүлсэн байдаг юм билээ. Тэгэхээр олон улсын зөв зүйтэй сонсголын хэлбэрүүдийг тусгах ёстой.
Нийтийн сонсголын тухай хууль батлагдснаар хууль тогтоох болон төрийн шийдвэр гаргах үйл ажиллагаанд иргэний оролцоог хангах, иргэд төрөөс гарах шийдвэрийн талаар өөрийн санал бодлоо илэрхийлэх, шийдвэрт нөлөөлөх эрх зүйн үндэс бүрэлдэж, төр иргэн хооронд мэдээллийн эргэх холбоо үүсч, иргэдээс төрд итгэх итгэл нэмэгдэх, хууль, нийтээр дагаж мөрдөх хэм хэмжээ тогтоосон актын чанар сайжрах, тэдгээрийг нийтээр хүлээн зөвшөөрөх, УИХ, ИТХ зэрэг төлөөллийн байгууллагаас олон нийтийн оролцоотойгоор төрийн захиргааны байгууллагын үйл ажиллагаа, албан тушаалтныг хянах механизм бүрдэх зэрэг олон эерэг үр нөлөөг бий болно гэж үзэж байна.
УИХ-ын гишүүн С.дэмбэрэлийн ажлын алба
