УИХ-ын гишүүн С.Дэмбэрэл Төр засгийн удирлага, төлөөлөгчдийн хамт жил бүр хуралддаг “Азийн төлөөх Боаогийн чуулга уулзалт”-нд оролцохоор энэ сарын 06-нд БНХАУ-ын Хайнань мужийн Саньяа хотыг зорилоо. Энэхүү Чуулганаар Азийн 40 гаруй улс орон болон бусад тивийн улс орон, бүс нутгийн засгийн газрын тэргүүн, бизнесийн салбарын удирдагч, мэргэжилтнүүд оролцож, "Далайцтай хөгжил" сэдвийн хүрээнд хэлэлцэх юм. Сүүлийн жилүүдэд Азийн орнуудын эдийн засаг өндөр хурдтай хөгжихийн зэрэгцээ зарим оронд хямрал илэрсэн байна. Энэ удаагийн Боаогийн Азийн чуулган Азийн орнууд өргөн хүрээнд хөгжлийг биелүүлэхэд оюуны дэмжлэг болж, хямралыг зохицуулах нааштай боломжийг бүрдүүлнэ гэж үзэж байгаагаа олон мэргэжилтнүүд үзэж байна.
УИХ-ын дарга З.Энхболд болон УИХ-ын 5 гишүүн, ажлын хэсгийнхэн, хэвлэл мэдээлэл, хамгаалалт үйлчилгээний баг бүрэлдхүүн энэхүү Чуулганд оролцох юм байна. Боаогийн Чуулганд Азийн орнууд өндөр ач холбогдол өгдөг бөгөөд БНХАУ-ын дарга Си Зиньпин уулзалтанд оролцогсдыг хүлээн авч, угтан мэндчилж, хамтдаа ёслолын зураг авахуулж, хуралдааны төгсгөлд хүндэтгэлийн зоог барих юм байна.
Манай төлөөлөгчид хуралд үг хэлж, телевизын ярилцлага өгөхөөс гадна, БНХАУ-ын дарга Си Зиньпинтэй уулзах ажээ. Мөн буцах замдаа Бээжинд бууж, Бүх Хятадын Ардын Төлөөлөгчдийн Их Хурлын Байнгын Хорооны дарга Жан Дөзянтай Ардын Их Хурлын ордонд уулзалт хийх юм байна. Манай төлөөлөгчдийг Өвөрмонголын ӨЗО-ны Ордос дахь "Чингис хааны онгон" аялал жуулчлалын цогцолбор үзүүлэх, "Шэньхуа" корпорацийн нүүрснээс шинэгэн түлш боловсруулдаг үйлдвэртэй танилцах юм байна.
