УИХ-ын чуулганы 2013 оны 11-р сарын 21-ны нэгдсэн хуралдаанаар “Төрөөс эрдэс баялгийн салбарт баримтлах бодлого батлах тухай” Улсын Их Хурлын тогтоолын төслийн анхны хэлэлцүүлэг дээр УИХ-ын гишүүн С.Дэмбэрэлийн хэлсэн үг:

•       Одоогийн байдлаар хувиараа ашигт малтмал олборлогч гээд нэг хэсэг иргэд, нөгөөх нь зохон байгуулалтанд ороод хоршоололын хэлбэрээр ашигт малтмал олборлож байгаа “бичил уул уурхай эрхлэгчид” гэсэн 2 субьект байна. Энэ 2 эрхзүйн ялгаатай өөр өөр субьект юм. Тийм учраас бичил уул уурхайг хөгжүүлэх чиглэлээр нь л заалт орж болохоос биш, байгаа бүх хэлбэрийг хэвээр нь оруулна гэвэл бас тохиромжгүй байж магадгүй. Бичил уул уурхай эрхлэгчид ч бас томуудтайгаа адилхан хариуцлагатай байх ёстой. Мөн тогтвортой ажиллах боломжоор ч хангагдсан байх ёстой. Тийм учраас “тогтвортой ба хариуцлагатай бичил уурхайг дэмжих” гэсэн заалт орох ёстой.
•       Эдийн засгийн аливаа салбар, түүний дотор дэд салбаруудад “илүү хурдацтай” гэдэг үгийг түгээмэл хэрэглэдэг. Өөрөөр хэлбэл, энд байгаа “түлхүү хөгжүүлэх” гэхийн оронд “илүү хурдацтай хөгжүүлэх” гэдэг үг хэрэглэх нь илүү тохиромжтой. Тухайн салбарын өсөлтийнх нь хурдац дотор өөр нэг дэд салбар илүү хурдацтай хөгжиж байж, нийт салбарын хурдац сайжирна гэсэн утгаар найруулгын засвар оруулах хэрэгтэй.