УИХ-ын чуулганы нэгдсэн хуралдааны2013 оны 10 дугаар сарын 11-нытэмдэглэлээс: Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийн тухай хэлэлцэх үед УИХ-ын гишүүн С.Дэмбэрэл-ийн хэлсэн санал:

Өнөөдөр энд засгийн газраас ерөнхий сайд, өөр 4 хүн л сууж байна. Уг нь бусад сайдууд нь бүгд ирэх ёстойсон. Энийг анхаараарай. Өчигдөр ярайтлаа сууж байсан хүмүүс өнөөдөр алга болчихсон байна. Асуудалд хандаж байгаа хандлага чинь ийм байж болмооргүй байна шүү.

-      - Өчигдөр би 6 асуулт асуусан. Яг үнэндээ асуултнууддаа хариу аваагүй. Бид төсвийн хариуцлага ярьж байна. Гэтэл та нар төсвийн хариуцлага энэ тэр гээд яриад байгаа хэрнээ, дотоодын нийт бүтээгдхүүнийдефицит /алдагдал/ 2 хувь байхад  улаан цайм, маш хариуцлагагүй юм мэдэгдэж байна шүү дээ. Жишээлбэл, валютын ханшийг 2014 оны эцэст хэд байхаар тооцоолсон бэ гэж асууж байхад л одоо байгаа валютын ханшнаас хол зөрүүтэй 2013 оны дундаж тоо гэгчийг баримталж тооцоолсон гэж хариулж байх жишээтэй. Бүр энэ оны эхэнд байсан тэр ханш буюу 1,384 төг гээд хэлчих шиг болох юм. Ийм амьдралаас тасархай дүн аваад, тэрүүгээрээ 2014 оны буюу ирэх оны төсвийг тооцоолоод явна гэж ер нь байдаг юм уу?

-      - Дээр нь, татварын ачаалал нэмэгдчихлээ, татварын нийт орлого, дотоодын нийт бүтээгдхүүний харьцуулсан харьцаа /тоон дээр чинь/ нэмэгдчихсэн байна гэхэд нэмэгдээгүй гээд нэгдүгээр ангийн хүүхдээс дор юм ярьж байна. Энэ одоо юу болж байгаа юм бэ? Энийг цаашдаа анхаарахгүй бол болохооргүй байна шүү.

-       - Мөн өчигдөр би Дотоодын нийт бүтээгдхүүний дефлятор гэж асуусан. Өөрөөр хэлбэл нэрлэсэн ба бодит Дотоодын нийт бүтээгдхүүний зөрүү болон хэрэглээний үнээр тооцсон инфиляци хоёрын зөрүү хэд байна вэ? гэж асуусан чинь хариу хэлэх хүн гарсангүй. Н.Батбаяр сайдын яриад байгаа тэр сүрхий дээд зэргийн тооцоо нь хаана байгаа юм бэ? Тийм сайн тооцоо, хариуцлагатай төсөв хийж ирсэн юм бол үүнийгээ батлаач. Та бүхэн санаж байгаа байх. Би  Ч.Улаан сайдаас 2014 онд махны үнэ хэд байх вэ гэж өмнө нь бас асууж байсан. Үүгээрээ, та бүхний энэ тооцоонууд чинь үндэслэл муутай байна шүү гэдгийг би илэрхийлж байсан юм шүү.

-     -  Дараа нь мөнгө, төсвийн бодлогын уялдаа яаж хангагдсан бэ, хоорондоо хэдэн удаа уулзаж ярилцсан юм бэ, юуг хэрхэн тохиролцсон бэ гэдгийг асуусан чинь мөн л хариулт байдаггүй.

-      - Хүмүүс дотоод, гадаад өрийн асуудлыг их ярьж байна. Энэ бол ярих ёстой асуудал. Хэмжээнээсээ ихэдсэн өр. Зөвхөн тооны хувьд биш, ерөнхий дарамт нь маш их байна шүү дээ. Төсвийн үүсэл, төрийн үйлчилгээний асуудал их дарамттай болж эхэлж байна.

-      - Хувьчлалын орлогыг хэд байхаар тооцоолсоныг асуусан чинь 26 тэрбум гэж хэлсэн. Энэ улсад чинь хувьчлал хийгдэхээ больчихсон юм уу? 2000 оны өмнө болон хойно явагдаж байсан хувьчлалууд үргэлжлэхгүй яасан юм бэ? Улсын үйлдвэрийн газрууд нь ажиллаад, алдагдал хүлээгээд байх юм.  Ийм тохиолдолд, эдгээрийн хувьчлал яагаад явуулахгүй байгаа юм бэ? Хувьчлалыг оруулж ирмээр байна. Тэгж байж төсөвт нэмэлт орлого хийгдэнэ. Энэ чинь нэмэлт орлогын асар том эх үүсвэр болно.

-      Өчигдөр албан бус секторын тухай Н.Батцэрэг гишүүн та нараас  асуулт асууж байсан. Бас хариулт авалгүй үлдсэн. Та нар 1997 оны юм яриад сууж байна шүү дээ.Үндэсний статистикийн газрын 2011 оны тооцоогоор нэг их наяд төгрөг байгаа шүү. Үүний 650 тэрбум нь далд эдийн засаг гэж тооцогдож байна. Энэ бол хамгийн даруухан тоо. Ийм зүйлс дээр тооцоогоо сайн хийхгүй оруулж ирээд байна шүү. Ингэж болмооргүй байна. Цаашдаа анхаараарай.

-      - Тогтвортой хөгжлийн талаар миний асуусан бас нэг асуулт бий. Дэлхий нийтийн хандлага нь нэгэнт тогтож, ерөнхий сайдын хариуцах ажил болоод орчихсон зүйл шүү. Үүн рүү ямар хөрөнгө оруулалт хийж байгаа вэ, энэ талаар баримталж байгаа бодлого чинь юу вэ гэхээр ерөнхий сайд, сангийн сайд, эдийн засгийн хөгжлийн сайд нар хариулахгүй байна. Нэг иймэрхүү л байдалтай байна. Үүнийгээ анхаарч ажиллаарай.