УИХ-ын гишүүн С.Дэмбэрэл, Ц.Цолмон нар хамтран Улсын нэгдсэн төсвийн тухай, Төсвийн тухай, Нягтлан бодох бүртгэлийн тухай хууль болон холбогдох бусад хуулиудад төсөв, санхүүгийн жилийг 9 дүгээр сарын 22-ны өдрөөс эхлүүлэх талаар нэмэлт, өөрчлөлт оруулах хуулийн төслийг санаачлахаар ажиллаж байна.
Монгол улс төсөв, санхүүгийн жилийг тухайн жилийн 1 дүгээр сарын 1-нээс эхлүүлж байгаа нь жилийн дөрвөн улиралтай манай орны хувьд бүтээн байгуулалт, хөрөнгө оруулалтын ажлын мөчлөгтэй тохирохгүй, төсөл тендер шалгаруулалтын шатанд хугацаа алддагаас хөрөнгө оруулалт он дамжиж, өртөг зардлыг нэмэгдүүлэх сөрөг үр дагаврыг үүсгэж байгааг үндэслэл болгожээ.
УИХ-ын гишүүн С.Дэмбэрэл, Ц.Цолмон нар Монгол улсын ерөнхий сайд Н.Алтанхуягт хандан УИХ-ын бусад шийдвэрийн төсөл боловсруулах, өргөн мэдүүлэх журмын тухай хуулийн 3.1.4-д заасны дагуу Засгийн газрын санал, дүгнэлтийг авахаар санал хүргүүлсэн байна.
Уг санал авахаар мэдээлэл хүргүүлэхдээ дараах хуулийн төслүүдийг хавсаргажээ. Үүнд:
1. Улсын нэгдсэн төсвийн тухай, Төсвийн тухай, Нягтлан бодох бүртгэлийн тухай хуульд нэмэлт, өөрчлөлт оруулах тухай хуулийн төсөл,
2. Улсын нэгдсэн төсвийн тухай, Төсвийн тухай, Нягтлан бодох бүртгэлийн тухай хуульд нэмэлт, өөрчлөлт оруулах тухай хуулийн төслийн танилцуулга,
3. Улсын нэгдсэн төсвийн тухай, Төсвийн тухай, Нягтлан бодох бүртгэлийн тухай хуульд нэмэлт, өөрчлөлт оруулах тухай хуулийн төслийн үзэл баримтлал
4. Холбогдох хуулиудад нэмэлт, өөрчлөлт оруулах тухай хуулийн төслүүд
Tweet